باع بلده عشان واحدة بيحبها، واشتغل لحساب الموساد ببلاش
ولما مسكوه قال: «خدوني أنا وبلاش هبة»..
👇
كان هيبلغ إسرائيل بساعة الصفر لحرب أكتوبر والسادات قال:
«لولا مسكناه كانت قواتنا ضاعت في كام ساعة»!
👇
قصة فاروق الفقي.. أخطر جاسوس ضد مصر..
👇
قبل حرب أكتوبر.. رجالة المخابرات العامة والحربية كانوا هايتجننوا بسبب عمليات إسرائيل المعقدة ضد حائط الصواريخ وقوات الصاعقة المصرية..
والحيرة زادت لما اليهود ضربوا مبنى معين في مدرسة الصاعقة وقت اجتماع على أعلى مستوى من السرية، موجود فيه أهم ضباط السلاح!
والشك في وجود جاسوس جوا القيادة بقى مؤكد..
والكل اتحط تحت المراقبة من أكبر راس لأصغر شخص مطلع على اجتماعات وأنشطة قوات الصاعقة.
وفي وسط عمليات البحث بيقع في إيد المخابرات العامة خطاب مبعوت من مصر لألمانيا..
ومن حسن الحظ إن الخطاب مكنش متشفر ومكتوب بالحبر السري بس.
ولما عرفوا اللي فيه كانت صدمة.
الخطاب كان فيه تفاصيل اجتماع حصل في مبنى قيادة القوات البحرية لمناقشة عملية لقوات الصاعقة والصاعقة البحرية.
واتشكلت خلية بحث واتحددت أسماء المشاركين في الاجتماع وهما:
قائد القوات البحرية، وقائد لواء الضفادع البشرية، والمقدم أحمد شوقي رئيس عمليات قوات الصاعقة، والمقدم فاروق الفقي رئيس الفرع الهندسي للصاعقة.
واتحط الكل تحت المراقبة، واتزرعت أجهزة تنصت في بيوتهم.
واكتشفت المخابرات حاجة غريبة في بيت المقدم فاروق الفقي..
والغريب إنه ركب «إريال» راديو جديد للإرسال فوق سطح بيته.
ووقتها «إريال» الراديو كان انتهى في مصر.
وهنا بقى المتهم الأول.
ولما المخابرات تابعت الخطابات اللي بيبعتها بالحبر السري اتأكدت إنه الجاسوس.
وبيقول الفريق محمد رفعت جبريل، ثعلب المخابرات العامة والمسؤول عن العملية:
بعد ما اتأكدنا من المعلومة قررنا نقبض عليه بشكل سريع جدًا بسبب خطورة موقعه.
وأيامها فاروق الفقي كان اتولى رئاسة أركان الصاعقة.. وكان الوحيد من الرتب الصغيرة اللي بيحضر اجتماعات الجيش برئاسة المشير الجمسي رئيس هيئة عمليات القوات المسلحة..
ده غير إن فاروق كان مسؤول عن جميع تجهيزات الصاعقة، وبيحضر اجتماعات قائد القوات مع جميع القادة لوضع الخطط المستقبلية.
وبيطلع الفريق رفعت جبريل على (اللواء فؤاد نصار) مدير المخابرات الحربية وبيحط قدامه كل المعلومات.
واللواء فؤاد نصار بيتصل باللواء نبيل شكري قائد الصاعقة ويبلغه..
وعلى التليفون اللواء نبيل شكري بيقول للفريق رفعت جبريل:
إنت ممكن تشك فيّا أنا شخصيًا لكن فاروق لأ..
ده ظابط شديد الوطنية وبيشتغل بإخلاص.
بس ثعلب المخابرات قاله: الأدلة لا تقبل شك.
وبعدها بيستدعوا فاروق الفقي على أساس إن في عمليات محتاجينه فيها..
وبيروح فاروق بشكل طبيعي من غير ما يشك في أي حاجة..
ولما بيوصل بيلاقي الفريق محمد رفعت جبريل في وشه..
ويدوب دقايق وقال على كل شيء.
ووقتها المخابرات المصرية مكانتش لسه تعرف حاجة عن شريكة فاروق الفقي وهي الجاسوسة هبة سليم.
لكن فجأة فاروق قالهم: هبة ملهاش دعوة بحاجة!
وهنا سألوه: هبة مين؟
وابتدى يحكي قصته معاها من الألف للياء.. وإنه بيعشقها بجنون.. وهي اللي طلبت منه يشتغلوا لحساب الموساد ووافق عشان يرضيها وتوافق تتجوزه.
وبيقول الفريق رفعت جبريل:
العلاقة بينهم كانت خاصة، وكان بيحبها جدًا، بس هي مكانتش بتحبه.. ولما اتجندت في باريس قالتلهم على (فاروق الفقي) فطلبوا منها تجنيده فورًا، فرجعت على القاهرة وكلمته واستجاب سريعًا.. وخدوا شقة في المعادي وعلمته فيها الكتابة بالحبر السري.
والغريب إن فاروق قدم للموساد معلومات كتير مكانتش مطلوبة منه..
ولما اتسأل عن السبب قال:
أنا بني آدم مخلص في شغلي.. وبحب أعمل شغلي بإتقان شديد.. وأقدم أكتر من المطلوب!
ورغم كل ده حتى معرفش يبوس هبة.. اللي كانت مانعة نفسها عنه وبتقوله "استنى لما نتجوز"!
وكمان ماخدش فلوس من الموساد.. وبقى يقول لهبة:
"حوشيهم معاكي عشان نتجوز في بيت فاخر”!
وبيتحول "فاروق" للمحاكمة وبياخد حكم بالإعدام..
بس قبل التنفيذ المخابرات بتستخدمه بذكاء لتوصيل معلومات مغلوطة لإسرائيل..
والراجل كان بيعمل المهمة على أكمل وجه عشان ينقذ حبيبته.
لكن في نفس الوقت رجالة المخابرات كانوا شغالين على خطة عشان يمسكوها.. وقدروا يستدرجوها من باريس لليبيا للقاهرة..
وبعد حرب أكتوبر.. الاتنين اتنفذ فيهم حكم الإعدام.
وبعدها الرئيس السادات قال:
"لولا العملية دي إسرائيل كانت هتقضي على القوات المصرية في أول ساعة من الحرب"!
والسر إن فاروق الفقي كان من الناس اللي هيعرفوا ساعة الصفر لحرب أكتوبر، وكان هيبقى موجود في غرفة العمليات وعنده مهام خطيرة في عملية العبور.