خانت مصر بـ1000 دولار في الشهر
وباعت جسمها لضابط في الموساد
ورتبتها كانت ملازم أول في الجيش الإسرائيلي
👇
جوزها قالها: «معروض عليا أبقى جاسوس»
فردت وقالتله: «يادي الهنا.. أنا قبل منك في الشغلانة»
وجندت ولادها يصوروا المواقع العسكرية
👇
خدت إعدام لكن الرئيس السادات عفا عنها وسلمها لإسرائيل
وهناك رموها واشتغلت عاملة نظافة في الحمامات
وماتت على الديانة اليهودية
وحكايتهم اتعملت في مسلسل السقوط في بئر سبع
👇
قصة انشراح موسى.. أخطر جاسوسة عرفتها مصر في التاريخ
👇
اتولدت في المنيا، واتعلمت لحد الإعدادية، واتجوزت من إبراهيم شاهين بعد ما شافها في فرح، وعاشوا مع بعض في العريش، عشان كان بيشتغل كاتب حسابات بمكتب مديرية العمل هناك.
ولما بتحصل نكسة 67، الأسرة بتعيش وضع صعب، وبيطلع إبراهيم شاهين على مكتب الحاكم العسكري الإسرائيلي في سيناء وبيطلب تصريح سفر للقاهرة ليه هو ومراته.
وبيطلبوا منه يرجع بعد كام يوم.
وبيروح في الميعاد لكن مابيلاقيش التصريح..
واتكرر الموضوع يوم ورا التاني.. لحد ما"إبراهيم" اتعصب في مرة وفضل يزعق ويسأل: فين التصريح؟.. فين التصريح؟..
وهنا بيخرجله ظابط اسرائيلي اسمه (أبو نعيم)..
وإبراهيم بيقوله:
أنا ولادي عند أخويا في القاهرة، وعاوز أروح أشوفهم، ومفيش أكل في بيتي ولا فلوس..
و"أبو نعيم" بيعمل متأثر باللي سمعه، وبيديله شوال دقيق وشاي وسكر..
وإبراهيم شاهين بياخد الحاجة ويطلع جري على "انشراح" ويقولها: "خلاص التصريح هيطلع"..
وبعد كان يوم بيجيله استدعاء من مكتب "أبو نعيم".. ولما راح قالوله:
"التصريح هيطلع.. لكن بشرط.. تقولنا أسعار الفاكهة والخضار في القاهرة".
وبيوافق فورًا وهو بيقول:
"بس كدا؟..
بسيطة أوي..
أنا هجبلكم أسعار كل حاجة وأنا راجع.."
وعرف "أبونعيم" إن الصنارة غمزت!
وتاني يوم بتوصل عربية جيب عسكرية لبيت إبراهيم شاهين.. وبيطلبوا منه يروح مكتب الأمن..
وهناك كان مستنيه ظابط إسرائيلي اسمه (أبو يعقوب)..
ومن اللحظة الأولى.. حس "أبو يعقوب" إن "إبراهيم" عارف المطلوب فقاله:
هتطلع على بئر سبع..
وفي بئر سبع خد دروة تدريبية واتعلم الكتابة بالحبر السري..
وقبل ما يمشي سلموه 1000 دولار..
ورجع "إبراهيم" البيت ومعاه الدولارات..
و"انشراح" لما شافتها سألته: الفلوس دي منين؟..
فقالها: أصلي بلغت عن مكان فدائي مصري فادوني مكافاة وهاخد تصريح السفر كمان كام يوم..
والست قالته: جدع!
وسألها إبراهيم: بس دي مش خيانة؟..
فردت وقالت:
لا..
مهو كدا كدا كانوا هايمسكوه.. وحد تاني ياخد الألف دولار مكانك
مفيش خيانة ولا حاجة.
وبتبارك انشراح موسى بداية مشوار الجاسوسية..
ويوم ١٩ نوفمبر ١٩٦٧ وصل التصريح..
و"إبراهيم" و"انشراح" راحوا القاهرة
والحكومة إدتهم شقة مجانًا في حي المطرية ورجعوه وظيفته..
بس الخيانة كانت في الدم.. وابتدوا يجمعوا معلومات
وكل معلومة بتتسجل بالحبر السري
و"انشراح" تبعت للموساد..
وفي نهاية كل جواب يكتبوا:
تحيا إسرائيل العظمى..
وسنة ٦٨؛ سافرت "انشراح" و"إبراهيم" لروما وقابلوا مندوب الموساد.. اللي إدالهم وثيقتين سفر إسرائيلتين باسم (موسى بن ديفيد) و(دينا بن ديفيد)..
ومن روما ركبوا الطيارة..
وفي إسرائيل استقبلوهم زي الأبطال..
و"إبراهيم" خد رتبة عقيد في الجيش الاسرائيلي بمرتب ١٥٠٠ دولار و"انشراح" ملازم أول بمرتب ١٠٠٠ دولار.
وبعد الزيارة رجعوا مصر.. وزودوا شغلهم في تصوير القواعد العسكرية والمصانع الحربية والمدارس والمنشآت وعملوا خرايط كل الأماكن وبعتوا للموساد.
ومعظم العمليات اللي نفذتها إسرائيل ضد أهداف في العمق المصري كانت بمساعدة "انشراح" و"إبراهيم".
والاتنين متهمين بالتسبب في استشهاد الفريق عبدالمنعم رياض.. لكن مفيش دليل إنهم بالفعل بلغوا بميعاد وصوله للجبهة ولا فيه تحقيقات حصلت معهم بخصوص العملية دي.
المهم "انشراح" و"إبراهيم" لما جم يوسعو النشاط... قرروا يجندوا ولادهم التلاتة "عادل ونبيل ومحمد".. عشان تكون أول عيلة جواسيس في العالم..
ومع الوقت معارفهم كترت خصوصًا من ظباط الجيش والطيارين..
ومهمة الولاد كانت التجسس على زمايلهم من أبناء الظباط..
والعيلة استمرت لحد ما كانوا متجمعين في يوم بيتفرجوا على التلفزيون وشافوا فيلم تسجيلي عن جاسوس اتمسك وشنقوه..
ومع تتر النهاية كلهم خافوا واترعبوا ووقفوا كتابة تقارير..
لكن الكلام ده معجبش "انشراح".. فسافرت روما، وقابلت "أبو يعقوب"، وحكتله عن القلق اللي هما فيه.. فحاول يهديها وخدها يسهروا ويشربوا وعملوا علاقة آثمة..
وابتدت علاقتهم المشبوهة تزيد في كل زيارة بعد ما الشغل رجع تاني..
وفي أواخر سبتمبر ١٩٧٣؛ "انشراح" كانت في روما عشان تقابل "أبو يعقوب".. والزيارة طولت لحد ما قامت حرب اكتوبر وهي هناك..
ويومها "أبو يعقوب" دخل عليها وهو بيعيط ويقول: "إسرائيل هتنتهي"..
و"إنشراح" قالتله:
إحنا بعتنلكم ٥ رسايل إن المصريين هيضربوا لكن محدش اهتم بالمعلومات
وبعد حرب أكتوبر فضل الجواسيس شغالين.. والموساد سلمهم أحدث جهاز لاسلكي في العالم..
وكان ده سبب وقوعهم في إيد المخابرات المصرية..
ووقتها مصر كانت جابت جهاز سوفييتي متطور جدا اسمه "صائد الموجات".
وإبراهيم شاهين شغل الجهاز وبعت منه أول رسالة..
والجهاز لقط إشارات اللاسلكي.. والمخابرات اتحركت عشان تمشط المنطقة اللي جاي منها الإرسال لكن مقدروش يوصلوا للموقع بالظبط..
وتاني مرة فتح فيها الجهاز المخابرات حددت مكانهم..
ويوم ٥ أغسطس ١٩٧٤ اتقبض على "إبراهيم"..
ومن أول لحظة انهار..
وقال: "أنا غلطان.. بس الجوع كافر"..
واتنقل "إبراهيم" لمقر المخابرات.. والظباط فضلوا موجودين ف البيت مع ولاده منتظرين وصول "انشراح" من برا مصر.
ولما دخلت البيت لقت رجالة المخابرات ف وشها.. ومن كتر خوفها عملتها على نفسها..
واتحكم على "إبراهيم" و"انشراح" بالإعدام.. وابنهم الكبير بالسجن ٥ سنين.. والاتنين التانيين دخلوا الأحداث
والحكم اتنفذ في "ابراهيم".. والرئيس السادات عفا عن "انشراح" في إطار صفقة مع الإسرائيليين للإفراج عن أسرى مصريين وضمن ترتيبات عملية السلام
وسافرت "انشراح" وولادها على اسرائيل.. وبقى اسمها الرسمي "دينا بن ديفيد"
وهناك خدوا الجنسية وبقوا يهود..
وعشان اللي يبيع بلده ملوش تمن.. ف النهاية "إنشراح" اشتكت من إهمال إسرائيل ليها ولأولادها لدرجة إنها اشتغلت عاملة نظافة في الحمامات..