رسالة إلى السيد حسام عبد الفتاح محافظ القليوبية..
سيادة المحافظ.. إنت من حقك كمحافظ إنك تعمل جولات تفقدية فى المدارس للإطمئنان على تجهيزات السنة الدراسية الجديدة لراحة التلاميذ قبل بدء العام الدراسي و لكن هناك بعض الملاحظات عليك إنت شخصيا :
أولا : هو حضرتك و إنت رايح تزور المدرسة مركب ميكروفون فى الجاكيت و جايب طابور من معاونيك يصوروا ليه هل ده نوع من أنواع الشو الإعلامي ولا عاوز توصل للقيادة إنك راجل نشيط.
ثانيا : هل نما إلى علم جنابك قبل الزيارة إن المدارس الحكومية لا تلقى أي إهتمام أو رعاية من الحكومة ولا حضرتك نايم فى العسل.. يعني جنابك كنت فاكر إنك هترووح تلاقي المدرسة زي مدارس الإنترناشيونال.
ثالثا : هو جنابك مش عارف إنك موظف حكومي زيك زي مديرة المدرسة إللي طلعت أجدع من الحكومة و صرفت على المدرسة من جيبها الخاص مية و كهربا و مجاري.. يعني المفروض تعاملها بإحترام حتى لو كانت مقصرة فى عملها تحاسب بالقانون الوظيفي.
رابعا : هل و إنت محافظ يعني على درجة وزير يصح إنك تقول لفظ لمديرة مدرسة تربي أجيال و تقولها "أزاي هعلم العيال النظافة إذا كنت أنا وسخ" هل ده لفظ لائق يقال لموظف زميل و يخرج من مسؤول كبير.
خامسا: عندما قدمت مديرة المدرسة الأوراق التي تثبت أنها من صرف على المدرسة من جيبها الخاص.. ألم يكن من الأجدر بحضرتك إنك تعتذر لها علنا أمام الجميع كما أهنتها و للأسف زودت الطين بله و قلت لها" متفهمنيش إنك بتصرفي على الدولة يا أستاذة".. أيه الكبر و الإشمئزاز فى المعاملة دي إنت فاكر نفسك أيه إنت لولا المعلم ما تعلمت القراءة والكتابة ولا أصبحت شئ بدونهم.
للأسف المعلمين أصبحوا هما الحيطة المايلة من بين وظائف الدولة أصبحوا يعاملون بدونية و إهانة سواء من بعض أهالي التلاميذ أو الوزارة و المحافظين و يجب أن تتدخل وزارة التربية و التعليم لوقف هذه المهازل من الكبير و الصغير ألا تعلمون أن المعلم فى دول العالم المحترمة شأنه كبير و يقدر و يحترم من الجميع.