أخر الاخبار

اسرار القبض علي صبرى نخنوخ

#امبراطورية_البلطجة | القبض على صبري نحنوخ كان بسبب خناقة في معرض سيارات في التجمع الخامس مملوك لأخين: الأصغر هو محمد الإمام والأكبر هو هشام الإمام. 

مين بقى هشام الإمام إللي قدر يحرك الداخلية للقبض على صبري نخنوخ بسبب فعل روتيني بيمارسه بقاله سنين بدون ما حد يقربله بل إنه خلال السنين دي كلها كان بيقوم بتأمين فاعليات حكومية للدولة عادي جدًا؟! 

هشام الإمام هو تاجر سيارات وأراضي وعقارات وأي حاجة بتقول «دولار» في مصر في آخر عشر سنين. ظهر اسمه بقوة في 2024 في أزمة مطاعم صبحي كابر. خرج صبحي كابر في فيديو شهير بيعيط وبيقول إنه اتضحك عليه من «ناس قادرة» أقنعوه يرهن إللي وراه وإللي قدامه عشان يجمع 200 مليون جنيه يستورد بيهم شحنة ذرة ضخمة؛ بعد ما سربوله معلومة إن سعر الذرة هيرتفع جدًا خلال شهور. وبعد ما سلّم الفلوس حطوه قدام سؤال روتيني جدًا: «الحاجة والدتك ربنا يباركلنا في عمرها بعد ما صلّت العشاء .. هل لازالت في العِش ولا طارت؟!»

طيب مين الناس القادرة دي؟ الناس القادرة دي مظهرش منهم على الشاشات غير «هشام الإمام» إللي من أول 3 كلمات هيخرجوا من لسانه هتدرك إنك قدام بالونة فاضية تمامًا على شاكلة أحمد الباز وإسلام سعد والصحبة الحلوة دي.

بالونة لدرجة إنه لما اتسأل عن شركائه قال إنهم 15 موظف على قدهم كل واحد مشارك بمبلغ صغير. لكن أنا أعرف وأنت تعرف ومن لا يشاهد كرة القدم يعرف، إن ال 15 دول فيهم واحد أو اتنين عبارة عن رؤساء مجلس إدارة شركة الناس القادرة. 

فالشاهد في الأمر يعني إن الخناقة دي مش خناقة صبري نخنوخ وهشام الإمام. الحقيقة هي خناقة الناس القادرة ( ١ ) من خلال صبيهم صبري نخنوخ مع الناس القادرة ( ٢ ) من خلال صبيهم هشام الإمام ومُشفق جدًا على الناس إللي بيحققوا معاهم دلوقتي وهما متوترين ومش عارفين يعملوا إيه. 

بس بإذن الله يكون جالهم التليفون إللي هيبرد نارهم ويهديهم للطريق السليم ويقولنا ويقولهم مين إللي انتصر في خناقة الغرف المغلقة وبالتبعية مين هيتحبس ومين إللي هينور الأسفلت وماذا سيفعل الفنان محمود الليثي في الأيام القادمة: احتفال ببراءة الصديق أم زيارات لسجن طرة وغناء للحديد إللي عمره ما كان جدع!
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -