🔴 الحرب شكلها راجعة... خلال الـ 24 ساعة اللي فاتت بس؛ إسرائيل استلمت 6500 طن ذخائر ومعدات عسكرية من أمريكا، والإمارات حظرت سفر مواطنيها لإيران والعراق ولبنان واستلمت وسائل دفاع جوي مباشرة من الصهاينة، وأمريكا بتجهز صواريخ متطورة وقوات برية، وإيران على الناحية التانية بتفعل منظومات الدفاع الجوي وبتطلع صواريخ جديدة من تحت الأرض!
في تطورات كتير حصلت في المنطقة في خلال الساعات اللي فاتت، وكلها مخيفة وشبيهة باللي حصل في الأيام اللي سبقت اندلاع الحرب في نهاية فبراير الماضي... بس المرة دي المؤشرات على احتمالية تجدد الحرب أكبر وأوضح بكتير...
⚫️ خلينا ناخدهم واحدة واحدة، ونبدأ من عند الكيان السرطاني... 👇
1️⃣🔶️ وزارة الدفاع الإسرائيلية أعلنت في تصريحات رسمية إن اسرائيل استلمت 6500 طن من الذخائر والمعدات العسكرية من أمريكا خلال 24 ساعة فقط... ولو مش مستوعب حجم الرقم، فـ خليني أقولك انه مش مجرد دعم عادي... إحنا بنتكلم عن جسر جوي وبحري كامل، شاركت فيه 2 من سفن الشحن الضخمة وعدد من طائرات النقل العسكرية، عشان تعيد تعبئة المخازن الإسرائيلية...
وبالتوازي مع وصول الكميات الضخمة دي كلها، وزير الدفاع الإسرائيلي طلع وقال في تصريحات بشكل واضح وصريح إن جيش الاحتلال "يستعد حاليًا للعودة لقتال إيران من جديد"...
يعني مش تلميح... لأ، المرة دي الكلام مباشر لأقصى درجة... وصحيفة Times of Israel ذكرت انهم عرضوا خططهم وبنك الأهداف الجديد على ترامب بالفعل!
2️⃣🟢 واللي يأكدلك إن الموضوع جد المرة دي، هو القرار المفاجئ اللي خدته الإمارات... 👇
وزارة الخارجية الإماراتية فجأة أعلنت حظر سفر مواطنيها إلى إيران ولبنان والعراق، وطلبت من كل الموجودين هناك يرجعوا فورًا وعلى وجه السرعة!
واخد بالك من كلمة (حظر سفر)؟ الموضوع مش مجرد تحذير عادي زي ما بيحصل في الطبيعي، لأ دول فرضوا حظر سفر كامل... والحكومات لما بتصدر قرار زي ده فالعادة بيكون عندها معلومة أو تقدير واضح بإن المنطقة دي مقبلة على حاجة كبيرة...
🔹️ بجانب ده، في أخبار بتقول إن طيران الاتحاد في أبوظبي فصل 15 موظف باكستاني وطلب منهم الخروج من البلد خلال 48 ساعة من غير أسباب واضحة...
باكستان اللي هي نفس الدولة اللي بترعى المفاوضات بين إيران وأمريكا، واللي الإمارات مش راضية عنها وحاولت تضغط عليها اقتصاديًا من خلال طلبها استرجاع وديعة إماراتية بقيمة 2 مليار دولار، وكان ممكن تسببلها مشكلة اقتصادية ضخمة لولا ان السعودية انقذتها ودفعت هي الفلوس...
3️⃣🟣 بس المفاجأة الحقيقية بقى، هي إن الإمارات مش بس بتحذر مواطنيها، دي بتجهز نفسها عسكريًا، بمساعدة مباشرة على الأرض من إسرائيل!
تقرير من صحيفة "فاينانشيال تايمز" سايبهولك في المصادر 👇 كشف إن إسرائيل خلال الأيام اللي فاتت زودت الإمارات بمنظومات دفاع جوي متطورة في إطار تعاون عسكري غير مسبوق...
الأنظمة دي شملت نظام مراقبة اسمه "سبكترو Spectro" قادر على رصد المسيّرات وخصوصاً طائرات شاهد الإيرانية على مسافة 20 كيلومتر، ومعاه نسخة من نظام الليزر الدفاعي "آيرون بيم Iron Beam" اللي بيدمر الأهداف الجوية بحزم ليزر أو طاقة موجهة، وده يعتبر أحدث ما وصل إليه العلم العسكري في مجال الاعتراض الجوي... وكمان تم نشر بطاريات دفاع تابعة لمنظومة القبة الحديدية...
🔸️ لاحظ إن ده مش كلامي، ده كلام واحدة من أكبر الصحف الاقتصادية في العالم، واللي كمان قالت إن في عشرات من الجنود الإسرائيليين راحوا بالفعل لأرض الإمارات للمساعدة في تشغيل المنظومات دي، بالإضافة لإن الصحيفة نقلت عن مصدر مطلع إن حجم التعاون العسكري وصل لمرحلة إن إسرائيل -لأول مرة على الإطلاق- سمحت للإمارات بالوصول لأنظمة عسكرية حديثة ولسه في مرحلة التطوير!
كل ده يفسرلك سبب العداء الإيراني المباشر للإمارات بالذات، وسبب تحذيراتها ليهم بإنهم يتوقفوا عن دعم إسرائيل والتعاون معاها، وإلا هيتم قصفهم بشكل مباشر... ولاحظ إني هنا بنقلك بس الخبر، ده مش رأيي الشخصي...
4️⃣🟡 وعلى ناحية تالتة، أمريكا هي كمان بتاخد خطوات خطيرة جدًا... 👇
تقارير من صحيفة ABC الأمريكية قالت إن إدارة ترامب بدأت بالفعل محادثات مع المشرعين علشان تاخد تفويض رسمي من الكونجرس لشن ضربة على إيران... وده في نفس الوقت اللي مجلس الشيوخ رفض فيه مقترح ديمقراطي كان هدفه وقف العمليات العسكرية... يعني كده ده مؤشر ضمني إن لسه في رغبة في التصعيد!
وبجانب ده، القيادة المركزية الأمريكية طلبت نشر معدات إضافية في الشرق الأوسط، ومن ضمنها لأول مرة صواريخ "Dark Eagle" فرط الصوتية...
🔹️ الصواريخ دي سرعتها أكتر من 5 ماخ (5 أضعاف سرعة الصوت)، ومداها بيوصل لـ 2700 كيلومتر... وسبب نشرها حاليًا هو إن الجيش الإيراني حسب التقارير العسكرية نقل منصات الصواريخ بتاعته خارج مدى صواريخ PrSM اللي كان بيستعملها الجيش الأمريكي في الجولة السابقة... وعشان كده أصبحت صواريخ Dark Eagle هي الحل المناسب لتدمير أهداف إيران المحصنة البعيدة عن مدى الصواريخ التقليدية...
5️⃣🔵 طيب هي إيران ساكتة على كل اللي بيحصل ده؟
لا خالص... 👇
خلال الساعات الأخيرة وكالة الأنباء الإيرانية أعلنت عن نشاط لمنظومات الدفاع الجوي في مناطق متعددة بطهران، في الغرب والوسط والجنوب الشرقي للعاصمة، وده بعد رصد مسيّرات استطلاعية في الأجواء. وده معناه إن في حالة استنفار بدأت بالفعل...
بجانب ده، صحيفة NBC كشفت إن إيران بتستخرج دلوقتي ترسانة ضخمة من الصواريخ الباليستية والمسيّرات اللي كانت مخبأة في أنفاق سرية وتحت ركام المواقع اللي اتضربت... والتقديرات الاستخباراتية الجديدة بتقول إن الإيرانيين نجحوا في حماية جزء كبير من قدراتهم عبر استراتيجية التوزيع والتمويه والدفن المسبق في خنادق محصنة موصلتهاش الضربات الأمريكية...
🔸️ وفوق كل ده قائد البحرية الإيرانية خرج من كام ساعة بتصريح خطير، قال فيه إن إيران ستكشف عن سلاح جديد تخشاه الولايات المتحدة بشدة، وقال إنهم هتصيبهم "نوبة قلبية" لما يشوفوه!
بعض المحللين العسكريين اللي قرأت كلامهم، بيقولوا إن السلاح ده في أغلب التقديرات ممكن يكون صاروخ كروز الصيني CM-302، اللي هو سرعته بين 2.5 و4 ماخ ومداه قرابة 290 كيلومتر، ومخصص أساساً لضرب السفن المتوسطة والكبيرة في الخليج... لو ده صح، هيكون إضافة نوعية خطيرة لمعادلة التوازن البحري في منطقة مضيق هرمز، وممكن تهدد السفن والمدمرات الأمريكية في بحر العرب!
⚫️ ولسه ده مش كل حاجة...
في تسريبات صحفية بتتكلم عن إن إيران هتبدأ قريب تستلم مقاتلات سوخوي Su-35من روسيا، في إطار صفقة بـ 6.5 مليار دولار...
الطيارة دي من الجيل الرابع المحدث 4.5، وقدراتها العسكرية متطورة جدًا وفيها رادارات حديثة قادرة تتبع أهداف متعددة وقدرات مناورة متقدمة، وتعتبر من أخطر الطيارات الحربية في العالم في فئتها... ولو إيران بدأت تستلمها بالفعل، فـ ده هيكون معناه إن الإيرانيين لأول مرة هيبقى عندهم قوات جوية حديثة... بس طبعًا استلامهم للمقاتلات دي معتمد على وجود وسائل دفاع جوي فعالة قادرة على تأمنيها عشان متتضربش وهي في المطارات..