أخر الاخبار

العلماء نجحوا في تجميد الصوت

🔴 من يومين، علماء الفيزياء نجحوا لأول مرة في التاريخ (يجمدوا) الضوء نفسه!! ويحولوه لنوع جديد من المادة، سائل وصلب في نفس الوقت!

ده مش خيال علمي، ولا سيناريو مستقبلي بعيد... بل هو اكتشاف علمي حقيقي حصل واتنشرت تفاصيله في بحث كبير من كام يوم، والنتايج بتاعته ممكن تغير فهمنا للكون كله!

طب ازاي الضوء اللي هو اصلا شيء مش مادي، ممكن يتجمد؟ وازاي في حاجة ممكن تبقى صلبة وسائلة في نفس الوقت؟

هات بقى كوباية شايك الحلوة والنعناع ف ايدك، وتعالى أحكيلك عن تفاصيل الموضوع المذهل ده ☕️👇

⚫️ بص يا سيدي... من حوالي اسبوعين الا كام يوم، وتحديدًا يوم 5 مارس اللي فات، في بحث علمي جديد نشره علماء من ايطاليا في مجلة "ساينس" العالمية بيعلن إنهم نجحوا - ولأول مرة في التاريخ - في تحويل الضوء لحالة مادية غريبة جدًا اسمها "السائل الصلب" أو المادة فائقة الصلابة "السوبر سوليد Supersolid"!

🔴 طب هو ايه السائل الصلب ده بالظبط؟

السوبر سوليد ده يا صديقي هو حالة مادية غريبة جدًا بتجمع بين خصائص متناقضة: بتبقى صلبة وذراتها منظمة زي المواد الصلبة (يعني ذراتها مرتبة في شكل بلوري) وفي نفس الوقت بتتحرك وبتتدفق زي السوائل لكن من غير أي احتكاك!

السوائل زي ما انت عارف، ليها لزوجة او Viscosity معينة، وللتبسيط ممكن نقربها لذهنك بإننا نطلق عليها معامل احتكاك.. ومعامل اللزوجة أو الاحتكاك ده بيعبر عن الاحتكاكات الداخلية اللي بتحصل جوه السائل وعلى سطحه وهو بيتحرك.. وكل السوائل التقليدية تقريبًا ليها لزوجة او معامل احتكاك ملحوظ.. يعني مثلا المية لما بتيجي تصبها من إزازة، لازم بتلاقي شوية نقط متجمعة على جدار الإزازة من جوه.. ونفس الكلام مع أي سائل تاني، باختلاف عدد القطرات، وعدد البقايا اللي بتتبقى من أي سائل لما بيتحرك..

لكن مواد ال Supersolid دي بقى بتبقى مواد صلبة، لكنها موجودة في صورة شبه السوائل.. وكنتيجة لده مبيكونش ليها لزوجة أو معامل احتكاك خالص تقريبًا.. وبالتالي فهي بتتحرك بدون ما تسيب وراها أي آثار، بشكل غريب أشبه بالسحر!

🟣 طب بتتعمل ازاي المواد دي؟

علشان تعمل حاجة زي دي، محتاج تبرد المادة لدرجات حرارة قريبة جداً من الصفر المطلق (حوالي -273 درجة مئوية).. ولو سألتني عن السبب، ف هشبهلك الموضوع بالأطفال اللي بتلعب في حوش صغير.. طول ما هما عندهم طاقة والجو طبيعي، هتلاقيهم بيتنططوا ف كل حتة ونشطين.. لكن لما الجو يبرد والدنيا تبقى تلج، هتلاقيهم بردانين وبيتكتكوا، ومش قادرين يتحركوا من مكانهم، وثابتين..

نفس الموضوع بيحصل في العالم الكمي.. لما تبرد المواد للحد ده، حركة الذرات جواها بتهدا خالص، وساعتها بتظهر تأثيرات ميكانيكا الكم الغريبة وبتحكم سلوكها، وبتحولها لنوع جديد ومذهل من المادة، صلب وفي نفس الوقت بيتحرك زي السوائل.. شبه الزئبق كده!

ومش بس كده.. ده العلم اكتشف إن في سوائل زي الهيليوم لما بتتبرد للدرجات دي، بتوصل لمرحلة مش بس ما بيبقاش فيها احتكاك، ده هي كمان ممكن تتسرب من الأوعية اللي هي محطوطة فيها وتطلع فوق الحواف لوحدها!

⚫️ طب ماشي.. ايه بقى علاقة الضوء بالموضوع؟!

في البداية، العلماء يا صديقي كانوا بيقدروا يعملوا السوبر سوليد ده من الغازات الذرية بس، اللي هي بتتكون من ذرات.. بس المفاجأة هي إن المرة دي نجحوا يعملوه من فوتونات الضوء نفسه عن طريق ربطها بالمادة بطريقة معقدة.. والاكتشاف ده لأول مرة في التاريخ يحول شيء طاقي وغير مادي زي الضوء، لشيء صلب وسائل في نفس الوقت.. حاجة مستحيل تصدقها ولا تفهمها الا لما تشوفها بعيونك!

لكن ازاي قدروا يعملوا حاجة زي دي؟!

العلماء يا صديقي في البحث الجديد بتاعهم، استخدموا طريقة مبتكرة علشان يقدروا يعملوا الإنجاز غير المسبوق ده..

1️⃣ الخطوة الأولى كانت انهم خلوا الضوء "يلتصق" بالمادة! وعلشان يعملوا كده، العلماء استخدموا شعاع ليزر مركز ووجهوه على مادة غريبة اسمها زرنيخيد الجاليوم (اللي هو مركب من الغاليوم والزرنيخ)... وأول ما الليزر اصطدم بالمادة دي، بدأ يتفاعل مع الإلكترونات جواها!

2️⃣ التفاعل ده خلق جسيمات هجينة غريبة اسمها "البولاريتونات".. ودي عبارة عن نص ضوء ونص مادة! حاجة بيسموها "أشباه الجسيمات أو Quasi Particles".. تخيل معايا كده كائن هجين زي المينوتور في الأساطير الإغريقية، بس المرة دي مش نص إنسان ونص ثور... بل هو نص ضوء ونص إلكترون!

3️⃣ البولاريتونات دي، عشان تبقى فاهمها بالظبط، هي عبارة عن تفاعلات منسقة بين مجموعة كبيرة من الجسيمات، بس بتتصرف كإنها كيان مستقل!

⚫️ يعني بالظبط زي الناس اللي بتبقى واقفة على الشط وعاملين صف طويل بجسمهم كده.. لو بصيت عليهم من وانت قدامهم، هتشوفهم ناس عاديين واقفين.. لكن لو بصيت عليهم من طيارة، هتلاقيهم مثلا راسمين بأجسامهم صورة طيارة ولا فراشة مثلا..

نفس الموضوع بالظبط بيحصل في البولاريتونات دي.. بتبقى عبارة عن اضطرابات في المادة بتتصرف كإنها كيان مستقل، برغم انها مش متكونة من جسيمات حقيقية، بل هي مجرد اضطرابات غير مادية عاملة بالظبط زي الأشباح اللي في افلام الرعب.. كيانات مالهاش اجسام مادية، وبرغم كده بتقدر تكسر وتبوظ الدنيا!

4️⃣ المهم بقى ان بعد كده، العلماء قدروا يتحكموا في البولاريتونات دي بعمليات توجيه معقدة عشان تتصرف زي المواد فائقة الصلابة.. يعني بالبلدي كده، قدروا يربطوا الضوء بالمادة بطريقة خاصة جدًا، وده خلاهم يعملوا سائل صلب، مكون جزئيًا من (فوتونات) الضوء!

🔴 طب معلش يعني بعد كل الكلام المجعلص ده، إيه فايدته الاكتشاف الغريب ده، وليه طالعين بيه السما؟!

حسب الدراسة، فالكشف ده مش بس بيدينا نظرة جديدة على طريقة التفاعل بين الضوء والمادة، بل هو كمان غير فهمنا للضوء نفسه.. النور اللي طول عمرنا فاكرينه عبارة عن طاقة ومالوش كتلة، دلوقتي بقينا نقدر نخليه يتصرف زي المواد الصلبة والسائلة في نفس الوقت! وبكده هنقدر نشوف ازاي الطاقة نفسها بتتفاعل مع المادة.. حاجة كده -تاني- أشبه بالسحر، ولو حد في العصور الوسطى شافها، كان هيفتكرنا شياطين بنستعمل السحر..

🟣 ومش بس كده.. الباحثين يا صديقي بيقولوا إن السوبر سوليد الجديد ده ممكن يستخدم في:

- تطوير كمبيوترات كمية Quantum Computers أحسن وأسرع من اللي موجودة حاليًا، اللي هي بالفعل أسرع مليون مرة من الكمبيوترات العادية!

- تصميم أنواع جديدة من الموصلات الفائقة Super Conductors اللي بتقدر تنقل الكهرباء بكفاءة من غير فقد في الطاقة..

- كمان ممكن يتم استعمالها في صناعة مواد تشحيم أو Lubricants بتشتغل بدون احتكاك نهائي.. وده ممكن يغير صناعة الماكينات والمواتير سواء في العربيات أو الطيارات..

- كل ده ولسه في تطبيقات تانية محدش حتى فكر فيها!

🔴 وهنا بقى ييجي السؤال: إحنا كعرب ومصريين فين من الأبحاث المتقدمة دي؟ وهل هنشوف يوم معامل ومراكز أبحاث عندنا بتعمل اكتشافات زي دي؟ ولا هنفضل بس بنستهلك التكنولوجيا من غير ما نشارك في صناعتها؟

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -