صحة المصريين في ذمة الله
أمس عايشت تجربتين لمرضي من فئات اجتماعية مختلفة
الأول مريض صاحب معاش وعنده تأمين صحي اصيب بجلطة في المخ وبدلا من نقله لمستشفي تأمين صحي به استشاري مخ واعصاب نقل لمستشفي عام خدماته رديئة ثم نقل بالاسعاف الي مستشفي تابع للتأمين الصحي واعراض الجلطة ظاهرة بدون فحوص وبدلا من اسعافه وانقاذ حياته بشكل عاجل (لازم ياخد حقنة اذابة الجلطة الأولي قبل مرور 8 ساعات ثم يواصل حقن اذابة الجلطات ) سألوه فين بطاقة التأمين الصحي ومتجددة والا لأ
وطبعا المريض مش مركز ومحدش بيخرج من بيته ومعاه دفتر التأمين الصحي
المهم لم تجري له الاسعافات اللازمة رغم القانون وقرارات وزير الصحة بدخول الحالات الحرجة وانقاذها لمدة 48 ساعة حتي في المستشفيات الخاصة ولكن ذلك لم يحدث واضطرت الاسرة لحمله بسيارة الاسعاف مرة اخري الي مستشفي خاص بها سرير رعاية مركزة
ووصل وبدأ العلاج ولكن الساعات التي اهدرت في الجدل البيزنطي كان يمكن ان تنقذه وتسرع من تحسن حالته
ولا نعرف لمن نلجأ في ظل هذه الفوضي
الحالة الثانية استاذة جامعية لديها مشكلة في مفصل الكتف وعملت عملية ومحتاجة علاج طبيعي بحثت في مراكز او دكاكين العلاج الطبيعي لقت مركز فخم الاثاث والديكورات وسالت عن علاج حالتها فكان رد الدكتور البقال مع كامل احترامي للبقالين لأنهم ناس محترمين
الجلسة بالف ومائة جنيه ولو تعاقدتي علي 12 جلسة تحسب الجلسة ب 900 جنيه بشرط سداد المبلغ فورا او 50% منه علي الاقل والباقي الجلسة القادمة
وبحثا عن تخفيف الالم دفعت 50% لتبدأ العلاج واذا بطبيبة شابة حديثة التخرج بلا خبرة دخلت لتشغل جهاز من اجهزة العلاج الطبيعي وتركتها وخرجت لتباشر مريض اخر ولما ارتفعت النداءات والصياح طلبا للمساعدة جاءت الطبيبة بمنتهي البرود لتقول الجهاز شغال وانا مش هاقعد جنبه
يعني تاخدي 900 جنيه وتسيبيني انا والجهاز
طيب اللي ربنا قدره ودفع تكلفة العلاج الخاص بياخد خدمة رديئة واللي تبع التأمين الصحي وحالته حرجة طلبو منه الدفتر ويكون متجدد
طيب المريض المصري العادي اللي مفيش عنده فلوس ولا تأمين صحي يعمل ايه ويروح فين
الصحة في مصر بقت مأساة زيها زي التعليم وربنا يلطف بينا