أخر الاخبار

الحقيقة في موت ذكري

في ليلة شتا حزينة من نوفمبر 2003، "الزمالك" صحيت على صوت طلقات مبيخلصش.. 21 طلقة اخترقوا جسم أجمل صوت في تونس ومصر، والحكاية اتقفلت بكلمة غيرة زوجية.. بس هل فعلاً الغيرة هي اللي سبب رحيل ذكرى؟ ولا فيه أسرار تانية في الكواليس كانت أكبر من مجرد مشكلة بين فنانة وزوجها رجل الأعمال.. تعالوا أقولكوا تفاصيل هتعرفوها للمرة الأولى عن الليلة اللي رحلت فيها ذكرى

 البنت اللي اتولدت سنة 1966 في تونس، وكانت أصغر إخواتها في عيلة كبيرة، كان ليها اسم حقيقي غريب شوية وهو ذكرى بنت محمد الدالي، لكن الدنيا كلها عرفتها باسم واحد بس ذكرى، وكأن القدر كان بيمهد إنها فعلًا هتفضل مجرد ذكرى غالية وصوت ملوش زي.

الحكاية بدأت من مسابقات الهواة، لما لفتت نظر الملحن عز الدين العياشي، اللي آمن بيها وقدم لها أول أغنية يا هوايا، وحصل بينهم مشروع ارتباط لكن النصيب كان ليه رأي تاني والقصة مكملتش.

 ذكرى لفتت بلاد المغرب العربي وليبيا بصوتها، وبقت المطربة المفضلة هناك، لكن حلم هوليود الشرق كان بيناديها.

النقلة الحقيقية كانت في مصر، لما قابلت الموسيقار هاني مهنا، اللي عرف يفك شفرة صوتها وقدم لها ألبوم وحياتي عندك، ومن هنا أبواب الشهرة اتفتحت لها على مصراعيها وبقت نجمة العرب الأولى في الوقت ده.

 لكن في عز النجاح ده، ظهر في حياتها رجل الأعمال أيمن السويدي سنة 2002.. حبها بشكل محدش يتخيله، حب كان فيه تملك وسيطرة لدرجة خنقت الموهبة اللي جواها.

 هاني مهنا كان معارض الجوازة دي وحاسس إنها مش هتنتهي على خير، وبالفعل بدأت الغيرة والشك ينهشوا في علاقتهم، خصوصًا إنه كان بيضغط عليها تبعد عن الفن والسينما والضوء.

في نوفمبر 2003، ذكرى رجعت من رحلة فنية بين قطر وليبيا، وبعد يومين بس، مصر والعالم العربي كله صحي على كابوس. 

خبر رحيلها المأساوي هي وجوزها ومدير أعماله وزوجته.

طيب إيه هي كواليس ليلة رحيلها ؟

الساعات الأخيرة في حياة ذكرى بدأت بسهرة عادية جداً في مطعم "بلوز" اللي كان بيملكه أيمن السويدي في المهندسين، وكان معاهم الفنانة كوثر رمزي صديقة ذكرى المقربة ومدير أعمال السويدي وزوجته.

 الجو كان متوتر، والشهود قالوا إن الخـ.ـناق بدأ هناك بسبب غيرة أيمن الشديدة وطلبه المتكرر إنها تقعد في البيت وتعتزل الفن تماماً، وهي كانت رافضة تضحي بنجاحها.

لما رجعوا شقة الزمالك في شارع محمد مظهر حوالي الساعة 3 الفجر، الخـ.ـناق زاد وصوته بقى عالي جداً.

 أيمن السويدي طلب من الفنانة كوثر رمزي إنها تمشي فوراً من الشقة، ورغم إنها كانت خايفة على ذكرى، إلا إنها اضطرت تمشي.

 كوثر رمزي بعد كده قالت في شهادتها إن أيمن كان في حالة عصبية غير طبيعية وكأنه مش في وعيه، وده اللي خلى الشكوك تزيد حولين حالته النفسية وقتها.

اللحظة الصادمة كانت لما أيمن مسك سلاحه، وبدأ يضرب نـ.ـار بشكل عشوائي وهستيري.

 التحقيقات أثبتت إن ذكرى اتصابت بـ 26 طلقة في مناطق متفرقة من جسمها، وده رقم صعب جداً بيأكد إن السويدي كان في حالة غل وانتقام مش مجرد لحظة غضب عابرة. 

مدير أعماله وزوجته كمان نالوا نصيبهم من الرصاص وهما بيحاولوا يتدخلوا أو يهـ.ـربوا.

وبعد ما أيمن السويدي هدي شويه.. حط فوهة السلاح في بوقه وأنهى حياته هو كمان. 

الجيران سمعوا صوت النـ.ـار وبلغوا الشرطة اللي اقتحمت الشقة ولقيت كل الموجودين توفاهم الله.

ومن هنا بدأت الألغاز؛ ليه السلاح كان جاهز؟ وليه مدير الأعمال وزوجته رحلوا وهما ملهمش علاقة بالخلاف؟ وهل فعلاً الخادمتين اللي كانوا في المطبخ سمعوا كل حاجة ولا كان فيه حد تاني في الشقة؟

الرواية الرسمية قفلت الملف على إن السويدي تخلص من حياته بعد ما أنها حياة كل الموجودين، بس أسرة ذكرى في تونس ومحاميها فضلوا سنين يشككوا، وطلعوا تقارير بتقول إن الطلقات اللي اتضربت كان من زوايا صعبة يضربها شخص واحد، وإن فيه "طرف تالت" ممكن يكون دخل الشقة وصفى الكل بسبب علاقات السويدي المعقدة أو أغاني ذكرى اللي كان فيها إسقاطات سياسية وقتها.

 التحقيقات الرسمية قفلت القضية بإن السويدي هو اللي عمل كده في لحظة غضب وغيره، لكن لحد النهارده، وبعد سنين طويلة، لسه فيه قصص بتتحكي في الكواليس، ناس بتقول تصفية حسابات وناس بتلمح لضغوط تانية أكبر بكتير من مجرد خلاف زوجي.

الحقيقة تاهت وسط الروايات، لكن اللي فضل لنا هو صوتها اللي لسه بيزلزل المشاعر كل ما نسمع الأسامي.

 هل كانت ضحية حب غريب؟ ولا كانت ضحية صراعات أكبر منها.. الأكيد إن ذكرى راحت، وسابت وراها لغز ملوش حل، وصوت مستحيل يتكرر.
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -