خرجت وزيرة الدولة الإماراتية ريم الهاشمي بتصريحات اعتبرها كثيرون تحذير مباشر لـ إيران، بعد الاتهامات الموجهة لطهران باستهداف منشآت مدنية داخل الإمارات العربية المتحدة.
الهاشمي قالت إن اللي حصل مش مجرد خطأ تقني زي ما بيتم الترويج لكنها أكدت إن الاستهداف كان متعمد وبيستهدف البنية التحتية المدنية والمنشآت الاقتصادية داخل الإمارات.
ووصفت التصرف ده بأنه سابقة خطيرة وغير عقلانية، لأن ضرب مدن ومناطق مدنية زي دبي وأبوظبي بيعتبر خرق واضح للقانون الدولي وما ينفعش يعدي كده ببساطة.
وفي نفس الوقت الوزيرة وجهت رسالة طمأنة وقالت إن الإمارات قادرة تحمي نفسها كويس جدًا، لأنها بتملك واحد من أقوى أنظمة الدفاع الجوي في العالم.
لكن بردو شددت إن المسؤولية الكاملة عن التصعيد الحالي تقع على طهران، وقالت بوضوح إن الكورة دلوقتي في ملعب إيران، وهي اللي تحدد شكل علاقتها مع جيرانها اللي كانوا دايمًا بيتعاملوا معها بحسن نية.
الهاشمي كمان حاولت تطمّن حلفاء الإمارات وأكدت إن الأزمات الحالية مش هتأثر على العلاقة بين الإمارات والولايات المتحدة، ووصفت الشراكة مع إدارة دونالد ترامب بأنها شراكة استراتيجية طويلة الأمد.
وقالت إن القواعد العسكرية الموجودة في الإمارات ما تمش استخدامها في أي عمليات لضرب إيران، وده حسب كلامها بينفي أي مبررات أو ذرائع ممكن تستخدمها طهران لتبرير استهداف الإمارات.
و قالت الهاشمي إن أي محاولات لزعزعة الثقة في الأسواق أو ضرب الملاحة في مضيق هرمز مش هتنجح، لأن اقتصاد الإمارات صخرة صلبة وقادر يتعامل مع الأزمات.