"كان بيمثل من وراء أبوه وفقد بصره ومعاشه خلاه يتعب أكتر".. دا اللي حصل للفنان حسن البارودي شيخ الممثلين وأبو الخشبة، اللي عاش حياة مليانة مواقف صعبة .. يا ترى إيه الحكاية تعالوا نعرف سوا.
حسن البارودي اتولد في القاهرة سنة 1890، ومن صغره وهو بيحب التمثيل، وموهبته ظهرت في مسرح المدرسة قبل أحداث 1919 .
كان طول الوقت يروح لأبوه ويقوله إنه نفسه يمثل لكن أبوه كان رافض تماما أنه يخليه يمثل، عشان التمثيل وقتها كان عار على أي بيت فيه فنان ، لكن هو أصر يحقق حلمه لدرجة أنه كان بيهرب بالليل وهما نايمين ويروح يمثل مع يوسف وهبي ويرجع من غير ما حد يحس.
لحد ما في مرة أبوه شافه وهو راجع بالليل وسأله كنت فين، وقتها حسن اضطر يقوله الحقيقة .. وسأله أبوه بتاخد كام قاله 15 جنيه، اتفاجئ وقاله دا انا بقالي سنين في شغلي ومرتبي 8 جنيه بس.
ومن وقتها قرر يسيبه يمثل ويحقق حلمه واشتغل جنب الفن مترجم في شركة سياحة، لحد ما انضم لفرقة حافظ نجيب وعزيز عيد، وبعدين راح لفرقة رمسيس مع يوسف وهبي.
حسن في الاول كان بيلقن الناس الدور من تحت الكمبوشة، لحد ما جات الفرصة وحل محل الفنان استيفان روستي في "غادة الكاميليا" وحفظ الدور كله، وبقى نجم.
بعد كده عمل فرقة خاصة مع الفنانة نجمة إبراهيم، وبعدين المسرح القومي، وقدم حوالي 200 مسرحية زي "السبنسة" و"سكة السلامة"، وأكتر من 100 فيلم زي "باب الحديد" و"الزوجة الثانية" و"ابن الشعب" الأولاني سنة 1934.
حسن كان شاطر جدا في دور الشيخ الطيب أو المنافق، وصوته المهيب ده خلى أم كلثوم تعشقه.
وفي عز نجوميته، حسن البارودي فقد بصره وبقى أعمـ.ى بس فضل يمثل ويروح المسرح عادي، ياخد ابنه معاه يحفظه الطريق علشان مايقعش، مع العلم أنه اتجوز مرتين وكان عنده 4 أولاد.
أم كلثوم أول ما عرفت اللي حصل له تدخلت بنفسها في أواخر أيامه، وخلته يتعالج بره على نفقة الدولة.
وفي سنة 1965 جاله جواب المعاش من المسرح القومي واتفاجئ أن معاشه 100 جنيه بس، ودا خلاه يدخل في اكتـ.ـئاب شديد وفضل قاعد في البيت ومبيخرجش منه نهائي.