أخر الاخبار

رجع للحياة وهو في جنازته

سنة 2020 قصة غريبة حصلت في قرية بحر البقر في مركز الحسينية بمحافظة الشرقية.

الحكاية بدأت لما أهل ولد عنده 14 سنة لاحظوا إن تصرفاته اتغيرت، بقى سرحان، بيتكلم لوحده، وبدأ يتعب نفسيًا. كوابيس بليل، عياط من غير سبب، وبدأ يبقى انطوائي.

بدل ما يودوه لدكتور نفسي، راحوا لواحد بيقول على نفسه معالج روحاني. 

الراجل أقنعهم إن ابنهم ملبوس من الجان، وإنه قتل ملك من ملوكهم، وإن الجان مش هيسيبه غير لما يموت ويتعمله جنازة كاملة.

الأهل للأسف خافوا وصدقوا كلامه، وقالهم نمثل إنه مات ونعمل صوان عزاء قدام الناس كلها علشان الجان يرضى عنه.

وفعلًا في الضهر أعلنوا إن الولد مات، ونصبوا صوان وخيام، والناس بدأت تيجي تعزي من كل حتة. 

المشهد كان حقيقي جدًا: نعش وعزاء وبكاء وكأن في جنازة بجد.

الولد كان محطوط جوه النعش من الضهر لحد العشا، مستنيين اللحظة اللي الدجال يقولهم فيها إن الجان خرج. فجأة، والناس قاعدة في العزاء، الولد قام من النعش وخرج قدامهم.

اللي حصل قلب المكان: صريخ وجري وناس اتفزعت وناس افتكرت إنه رجع من الموت.

لكن الحقيقة أبسط من كده، هو ما ماتش أصلًا.

طبيب في المنطقة اسمه دكتور حمدي سليمان قال إنه ما فيش أي شهادة وفاة اتعملت للولد، ولا حد من أهله كشف عليه طبيًا أصلًا، وأكد إن اللي حصل كله شعوذة وضحك على الناس.

المشكلة مش في الولد، المشكلة في خوف الأهل وجهلهم. 
الدجالين بيستغلوا أي أسرة قلقانة على ابنها، ويقنعوهم إن أي تعب نفسي أو تصرف غريب سببه جان ومس، والناس هناك مش مقتنعة أصلًا بفكرة المرض النفسي.

مع إن أغلب الحالات دي بتكون ضغط نفسي أو مشاكل مراهقة أو اضطراب نفسي بسيط، ويتحل عند دكتور مختص.

الفكرة اللي لازم نفهمها: مش كل حاجة غريبة تبقى جان.
متجوزتش أصل عندي تعطيل وعمل، مخلفتش حد عاملي سحر ومس عاشق، الكلام ده مش صح.

مش كل تعب يبقى مس. في أوقات الأزمات والتأخيرات بتكون ابتلاءات واختبارات من ربنا عشان يختبر مدى صبرنا وقوة تحملنا ولجوءنا إليه.

وأي مشكلة نفسية علاجها طبي عند طبيب نفسي، مش عند دجال أو مشعوذ.

سؤال مهم: لو كان الولد نفسه اتخنق في النعش فعلًا قبل ما يخرج، كان إيه اللي ممكن يحصل؟
هل كان نفعهم الدجل والشعوذة؟
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -