أخر الاخبار

بعد مهزلة الانتخابات المعني الحقيقي للبرلمان امال عثمان

المعني الحقيقي للنائبات البرلمانيه المصرية ..

عشان يبقي نقد بناء للفراشات الي في متعينين في المجلس الحالي بدون اي كوادر او مؤهلات 
المرة دي هنتكلم عن #آمال_عثمان
لما نيجي نتكلم عن #آمال_عثمان، إحنا مش بنتكلم عن ست دخلت البرلمان بالاسم، ولا نائبة جت بالقائمة، ولا تعيين، ولا “دور اجتماعي”، إحنا بنتكلم عن نموذج كامل لمعنى كلمة نائبة برلمانية… مش لقب وخلاص.
• دخلت مجلس الشعب المصري (البرلمان) منذ أواخر السبعينات (1976) واستمرت فيه حتى 2010، أكثر من 30 سنة تحت القبة عن دائرة الدقي والعجوزة . 
• كانت أول امرأة عربية تُنتخب وكيلًا لمجلس النواب (1997–2010)، يعني وصلت لمنصب رفيع داخل البرلمان ، مش بترأس جلسه حلف اليمين ويتعملها فرح .
عملت وزيرة للشؤون الاجتماعية لمده ٢٠ عاما من ١٩٧٧ حتي ١٩٩٧ .
من وزارة ممدوح سالم عام ١٩٧٧ حتي  وزارة كمال الجنزوري عام ١٩٩٧ .
• كانت عضو في الحزب الوطني الديمقراطي المنحل وعضو في المجلس القومي للمرأة ، المجلس الي بيشيد بالفراشات بتوعنا ابناء العاملين وبصورة رمزيه انهم بيترأسو الجلسة الافتتاحيه لان القدر خلي الاكبر سنا والاصغر سنا ستات ! 
#آمال_عثمان كانت دكتورة قانون، وأستاذة جامعية، ومحامية نقض، واشتغلت سياسة وهي فاهمة يعني إيه تشريع ويعني إيه رقابة.
دخلت مجلس الشعب وانتُخبت مش( اتعيّنت )، وقعدت تحت القبة سنين طويلة لأنها كانت بتشتغل، مش لأنها محسوبة على حد. جات بالانتخاب والناس الي اختارتها ، متعاملتش معامله الاقليات وان المراة لازم يبقي ليها كوته ، دا في حد ذاته انتقاص للمرآه مش نصره ليها ! 
كانت نائبة تعرف الفرق بين السؤال وطلب الإحاطة والاستجواب وتستخدمهم صح… مش ترفع إيدها وخلاص.
وكانت وزيرة تأمينات وشئون اجتماعية لما المنصب ده كان شغل تقيل، مش لقطات مصورة.
يعني واحدة فاهمة الدولة من جوه، وفاهمة البرلمان من جوه، وفاهمة الناس من الشارع.
وده يخلينا نسأل السؤال اللي موجع بقى: فين ده من اللي بنشوفه دلوقتي؟
دلوقتي عندنا نماذج دخلت المجلس تحت مسمى القائمة الوطنية لا نضال لا تاريخ عام لا شغل تشريعي ولا حتى حد أدنى من الفهم السياسي
كل المؤهل: ابن نائب سابق-بنت نائب سابق-قريب مسئول
زوجة شخصية نافذة او زوجة شهيد 
يعني البرلمان اتحول من سلطة شعبية إلى ألبوم عائلي.
الفرق بين #آمال_عثمان والنماذج دي إن #آمال_عثمان كانت بتدخل البرلمان عشان تحاسب السلطة ، إنما غيرها داخل عشان ما يزعّلش السلطة.
#آمال_عثمان كانت فاهمة إن الكرسي مسؤولية ، إنما غيرها فاكره مكافأة.
كانت فاهمة إن النائب صوت ناس ، إنما غيرها فاكره لقب اجتماعي.
فاللي زعلان من المقارنة يبقى المشكلة مش في الكلام
المشكلة في الواقع.
#آمال_عثمان نموذج مش معصومة ، لكن مؤهلة
والفرق بين المؤهل والمُعيَّن زي الفرق بين نائب وكومبارس.
والتاريخ… دايمًا بيفضل اللي اشتغل
مش اللي اتصوّر. متعها الله بالصحة والعافية.
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -