العنف الجنسي والاغتصاب الجماعي داخل المساجد في يوم "الفتح" العثماني لمصر
ابن إياس و ابن زنبل الرمّال، ذكروا في كتبهم، عمليات اغتصاب جماعي في العلن وفي المساجد من جنود الإنكشارية لسيدات مصر
الأول مين هما الإنكشارية دول؟
ده جيش النخبة اللي من غيرهم سليم الأول ماكنش يقدر يدخل القاهرة ولا يهزم المماليك
كانوا مجندين، انضموا للجيش العثماني من وهما أطفال من عائلات مسيحية، اتكونوا عن طريق نظام اسمه الدوشيرمة
والنظام ده كان بيعمله العثمانيين كل ٣ سنين، كانوا بيعملوا حملات على بلاد البلقان زي ألبانيا، واليونان، وكمان مناطق زي غرب روسيا وجورجيا و أوكرانيا حالياً
كانوا بيجمعوا حوالي ١٠ الاف طفل كل مرة وساعات أكتر، من عمر ٨ لـ ١٢ سنة، وبياخدوا الأطفال دول من العائلات المسيحية اللي كانوا عليهم جزية
فبدل ما العثمانيين ياخدوا فلوس، كانوا بياخدوا الأطفال دول في السن ده، ويحولوا دينهم، ويتربوا على الولاء للسلطان، وبيخضعوا لتدريبات عسكرية قاسية جداً، وكان في منهم بيموت في التدريبات دي لصغر سنهم، لحد ما يتحولوا لآلات حرب
وهما بالمناسبة اللي اقتحموا أسوار القسطنطينية ودخلوها وفضلوا يقتلوا كل اللي يقابلوه لمدة ٣ ايام متواصلة
الإنكشارية كان شرط عليهم انهم يفضلوا في الجيش لحد سن ٤٠ سنة، ممنوعين من الجواز، وعايشين في ثكنات عسكرية مغلقة، وده خلق بيئة قسرية ظهرت فيها علاقات جنسية بين الجنود نفسهم
اعتقد دلوقتي عندك فكرة عن سلوك الجنود دول بيكون ازاي، لما "يفتحوا" بلد جديدة
نرجع تاني لتوثيق ابن إياس و ابن زنبل الرمّال، وذكرهم لفوضى جنسية واغتصاب للسيدات المصريات
ابن إياس قال: "إنهم (جند العثمانيين) خطفوا امرأة عند سلم المدرسة المؤيدية وقت الظهر، وفسقوا بها جهاراً عند سبيل المؤيدية تحت دكان الذي يبيع الكعك، والناس ينظرون إليهم وهم يفسقون بها ولم يجسر أحد من الناس أن يخلصها منهم
حتى الستات اللي دخلت المساجد تحتمي فيها، الجنود دخلت وراهم بالخيول والأحذية واغتصبوهم داخل المساجد، وده حصل في مسجد الحاكم بأمر الله ومسجد ابن طولون
هل المصريين مادافعوش عن نفسهم ؟
اكيد طبعاً حصل، واحدة من الضحايا الجنود عرّوها، وربطوها من رجليها في حصان، وسحبوها في الشوارع على وشها لحد ما ماتت وبعدين اترمت في النيل، ده علشان حاولت تدافع عنها وعورت جندي بيعتدي عليها
ابن إياس شبه اللي حصل من الجيش العثماني في المصريين، باللي حصل في بغداد من المغول
وقال إن المصريين ماحصلش معاهم حاجة بالبشاعة دي قبل كدة، وإن الهدف كان إذلال شامل للرجالة والستات في مصر، لتثبيت حكم العثمانيين "الفاتحين"
الموضوع ماوقفش عند رجالة وستات بس، همجية العثمانيين طالت حتى الأطفال، وبرضو داخل المساجد
في واقعة حصلت في مسجد السلطان المؤيد، بعد يومين من دخول العثمانيين القاهرة
جنود الـ إنكشارية دخلوا المسجد بالقوة، وشافوا غلام صغير (خادم أو تلميذ)، اتلموا حواليه وبدأوا يعتدوا عليه جنسياً، داخل المسجد وقدام المصلين، وكان الجنود بيبصوا للمصليين ويضحكوا
المصليين حاولوا ينفذوا الطفل ده، فـ الجنود هجموا عليهم، وقتلوهم كلهم، وسابوا الجثث مرمية في المسجد وراحوا ومعهم الولد الصغير
القصص دي وآلاف القصص زيها بتوثق جرائم العثمانيين في مصر