الأول 🔥 محمد بهاء أبوشقة..
أشهر وأغنى محامي فيكي يا مصر.. وأتعابته بتبتدي من 5 مليون.. وملوش غير في قضايا الكبار ورجال الأعمال زي هشام طلعت مصطفى وأحمد عز.
وأبوشقة الصغير بدأ حياته وكيل نيابة.. وبعدين استقال وخد ماجستير ودكتوراه واشتغل في المحاماة ومكتبه بقى أكبر مكتب في البلد وثروته بالملايين.. وكان المستشار القانوني والمتحدث باسم حملة الرئيس السيسي في انتخابات ٢٠١٨.
👇
وييجي بعده محمد حمودة محامي المستشار ترك آل الشيخ
وبيقول عن نفسه أهم محامي في مصر.. وهو بالفعل من أغنى المحامين.. وثروته متقدرش تعرف هي كام من كتر فلوسه.
وابتدى حياته ظابط شرطة.. وتحديدا ظابط ف إدارة مكافحة المخدرات.. وعمل شغل الكل كان بيتحاكى بيه..
وفجأة خد أجازة بدون مرتب من الداخلية وبعدها طلع على فرنسا وعمل الدكتوراه
ولما رجع مصر اترقى وبقى مقدم بس قرر يستقيل ويشتغل ف المحاماة..
وقضية ف قضية الدنيا مشيت معاه وصيته بدأ يسمع وبقى يمسك القضايا المثيرة للجدل زي قضية غرق العبارة السلام.
وأتعابه بتعدي العشرة مليون في القضايا التقيلة.. وعشان كدا مش أي حد يوكل محمد حمودة يدافع عنه.
👇
والتالت أشرف نبيل..
وده بقى من سحرة المحامين.. وكان مدير لمكتب المرحوم فريد الديب..
وبيمشي بموكب الحراسات أدامه ووراه.. وعربيات الموكب بس تعدي الـ٥٠ مليون جنيه
وأشرف بيمسك قضايا معقدة بس بيقدر يطلع الثغرة ويجيب البراءة.. وفي أسوأ الأحوال يخفف الحكم.
وكلمة السر السيجار والقهوة السادة وموسيقى بيتهوفين زي ما بيقول.
👇
والرابع مرتضى منصور..
وعنده مكتب من أكبر مكاتب المحاماة في مصر. وأتعابه
بتبدأ من 3 مليون جنيه.
وشغال معاه اتنين من ولاده.. أحمد وأميرة
وعنده ف المكتب فوق الـ150 محامي
👇
وأخيرا خالد أبوبكر
من أتقل وأشطر المحامين المصريين والدوليين.. وابتدى شغل في سنة 98.. وأسس مكتب أبوبكر للمحاماة ف مصر.. وعنده فروع في دول الخليج وبعض الدول الأجنبية.. وبيترافع أدام محاكم أوروبا.
وخالد مستشار لأهم المؤسسات زي قناة السويس
وطبعا مبيقبلش أي قضايا.. والموكلين عنده كبارات البلد والمستثمرين العرب زي خلف الحبتور.