قصة شهداء الصاعقة في كهف سانت كاترين من الحكايات اللي قليل قوي اللي يعرفها، بس لما تسمعها تحس إنك قدام فيلم حربي حقيقي مش خيال، وقدام رجالة أشجع من سوبر مان.
بدأت أحداث القصة في إبريل سنة 1969 وسط حرب الاستنزاف، اتحرك قارب من سفاجا بالليل كان عليه حوالي 10 ضباط من قوات الصاعقة المصرية.
وكانوا طالعين في مهمة تدمير قاعدة صواريخ إسرائيلية في منطقة سانت كاترين، وجمع أي جزء من صاروخ علشان يتفحص في القاهرة.
وصلوا سينا في نص الليل ومعاهم كلب مدرب يكشف الألغام، وبدأوا يمشوا في الجبال والصحراء حوالي 3 ساعات في ضلمة كاملة لحد ما وصلوا للقاعدة اللي كانت مليانة جنود ومعدات. زرعوا العبوات الناسفة بهدوء، وفي نفس الوقت الملازم أول ميشيل المصري دخل جوه القاعدة وفك رأس صاروخ بنفسه علشان ياخده معاه للمخابرات العسكرية.
أول ما خرج بدأ التفجير، القاعدة اتقلبت نار ودخان وخسائر ضخمة وسط القوات الإسرائيلية، والرجالة بدأت الانسحاب حسب الخطة ناحية كهف سري في جبل كاترين يستخبوا فيه، لحد ما ييجي وقت الرجوع. لكن المكان كله بقى تحت قصف جوي مركز من العدو، وبعد أقل من ساعة رجعوا ضربوا الجبل تاني، وبعدين فضل القصف شغال أيام متواصلة علشان يمشطوا المنطقة.
الجنود المصريين كانوا جوه الكهف من غير أكل ومن غير مية، ومعاهم سلاحهم بس ومفيش أي نية للاستسلام. أول يومين اتنين منهم ماتوا متأثرين بإصاباتهم، بعدها كمان اتنين، وبعد أيام التعب والعطش أخدوا الباقي واحد ورا التاني، لحد ما العشرة كلهم استشهدوا وهما جوه الكهف.
لكن اللي يخلي القصة تقشعر إنهم ماتوا وهم مترتبين جنب بعض صف واحد، وكل واحد نايم على جنبه اليمين ووشه للقبلة ومحتضن سلاحه، وكأنهم دخلوا نوم مش موت، ومعاهم بوصلة علشان يحددوا الاتجاه، كأنهم بيستعدوا للقاء ربهم.
سنة 1984 بعض عرب سينا اكتشفوا الكهف، لقوا 10 هياكل عظمية بالزي العسكري والسلاح جنبهم ورأس الصاروخ وكراسة صغيرة فيها تفاصيل المهمة، وتم نقل رفاتهم لمقابر الجيش في السويس.
الحكاية دي بتفكرك إن فيه أبطال ضحوا بحياتهم في صمت، محدش سمع عنهم ولا خدوا تكريم كفاية، بس هم عملوا اللي عليهم لآخر نفس. اسأل نفسك لو كنت مكانهم محاصر ومفيش أمل، كنت هتستسلم ولا تفضل ثابت لحد النهاية؟
يعني تموت شهيد ولا تستسلم لعدوك؟؟؟؟؟
ربنا يرحمهم جميعًا ويجعل مثواهم الجنة.