أخر الاخبار

حكاية قبر ناهد شريف

عم جمال درويش راجل في الخمسين من عمره، عنده شغف كبير بأخبار الفنانين وأرشيفهم وتاريخهم.
عم جمال حكى إن سيدة لبنانية اسمها باتريسيا اتواصلت معاه من فترة وطلبت منه إنه يساعدها إنها تلاقي قبر أمها، ولما سألها مين أمها قالت الفنانة “ناهد شريف”، وقالت إن لمدة 38 سنة قبر أمها مش معروف موجود فين في مصر!!!

ناهد شريف توفت سنة 1981، لكن بنتها مقدرتش تعرف مكان قبرها فين، وكل اللي ظهر مجرد تخمينات مكنتش صح بالنسبة لبنتها، خصوصًا إنها ما زارتش مصر خالص.

عم جمال بعدها قابل واحد شغال في المقابر في الدفن والحراسة… في الوقت ده كانوا بيدوروا على قبر الفنانة الراحلة مديحة كامل، واتعرف على راجل تاني شغال في نفس المكان. الراجل ده قال إنه مش عارف قبر مديحة كامل، لكن يعرف قبر ممثلة قديمة اسمها ناهد شريف، مدفونة من حوالي 38 سنة!!!!!!!

وبعد كده تواصل عم جمال مع الإعلامية بوسي شلبي وقالها مكان القبر، وهي تواصلت مع بنتها باتريسيا، وفعلاً جت مصر وزارت قبر أمها ناهد شريف!

باتريسيا هي بنت ناهد شريف من زوجها إدوارد جرجيان، لبناني أرمني، لكن حصل بينه وبين ناهد خلاف كبير، خصوصًا لما تعبت ومرضت، ساعتها أخد كل فلوسها وفلوس تبرعات لعلاجها وهرب على لبنان، وسابها تواجه مرض السرطان لوحدها.

آخر مرة باتريسيا شافت أمها كان في المستشفى سنة 1981، كان وقتها ناهد شريف في لحظاتها الأخيرة وكانت تعبانة جدًا، وكانت باتريسيا عندها أربع سنين، وبصت لباتريسيا وقالت وهي بتبكي: “كان نفسي أعيش وأربي بنتي، بس ربنا عايز كده”.
ناهد شريف حضنت باتريسيا وأخدت آخر نفس وماتت وهي حضناها.

وقتها كان حاضر نجوم زي نادية لطفي ونجوى فؤاد ونبيلة عبيد وكمال الشناوي.
باتريسيا معرفتش مكان قبر أمها بسبب إن بعد وفاة ناهد مباشرة أخدها أبوها لبنان، حتى قبل ما تدفن ناهد أو يحضر عزاها، وما رجعتش مصر إلا بعد 38 سنة!

ناهد اتجوزت في حياتها ثلاث مرات، منهم كانت زوجة ثانية للفنان كمال الشناوي حسب مصادر مقربة منها، وفضلت 6 سنين مراته، لكنها مقدرتش تتحمل فكرة الزوجة الثانية رغم حبها الكبير ليه، لأن ناهد فضلت تحبه سنين من غير ما تقوله، لحد ما هو حس بالحب ده واتجوزها، لكن ناهد اتطلقت منه.

واتجوزت بعدها زوجها اللبناني إدوارد، اللي ناس كتير حذرتها منه، خصوصًا إنه كان مقامر وديانتهم مختلفة، لكن ناهد ما سمعتش كلامهم. اتخلى عنها في مرضها وسرق فلوس تبرعاتها.

واضطرت ناهد إنها تلجأ للسفارة البريطانية عشان تطلق منه وتساعدها ترجع مصر.

ناهد حاربت السرطان مرة وشفيت منه في السويد، ورجعت القاهرة عشان تتفاجأ بهجمة من المرض أكثر شراسة قضت على حياتها.

كمال الشناوي وقف معاها في مرضها وساعدها في السفر برة مصر للعلاج، وجمع كل التكاليف بعد ما أبو بنتها تخلى عنها، بمساعدة فنانين زي نبيلة عبيد ونادية لطفي.
كمال ما سابهاش لحد اللحظات الأخيرة وبكى بشدة يوم وفاتها!

ناهد ماتت يوم 7 أبريل سنة 1981 في مستشفى المعادي بالقوات المسلحة، بعد صراع مع مرض السرطان اللي انتصر في النهاية.

ادعولها بالرحمة والمغفرة.
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -