"سابت نجوميتها واشترت عبادتها".. دا اللي عملته الفنانة شيماء سعيد اللي قررت تتخلى عن الشهرة من غير مقدمات.
شيماء سعيد كانت في عز نجوميتها لكن قررت تفاجئ كل اللي بيحبوها وتبعد عن الفن من غير مقدمات بعد ما اختارت طريق تاني خالص، طريق الروح والإيمان.
شيماء وقتها قالت إنها حست إن في حاجة ناقصة جواها.. وبقت بتقول لنفسها إن الدنيا مش بس شهرة وفلوس، وعشان كده لبست الحجاب وبدأت تقرب أكتر من ربنا، وتصلي وتذكر الله في كل لحظة، ومع الوقت الصلاة والعبادة بقت مصدر قوتها الأكبر.
القصة مش مجرد كلام، دا شيماء سعيد حكت عن رحلتها دي بنفسها، وإزاي كانت بتحس بالضياع وسط الزحمة اللي حواليها، والأشخاص اللي بيحاولوا يستغلوا شهرتها.
وقالت كفاية وقررت تركز على نفسها وعبادتها، وغيرت حياتها بشكل كلي عشان تعيش حياتها بالطريقة اللي خلتها مرتاحة.
شيماء لما اتسألت عن شهرتها القديمة، كان ردها إنها ذكريات، بس اللي أنا فيه أحسن بمليون مرة، وقالت إن ده مش معناه إنها ندمت على أيامها في التمثيل، بالعكس هي شايفة إن الفن كان جزء من رحلتها للوصول للإيمان ده.
الجمهور اللي كان بيحبها في الشاشة، دلوقتي بيحبها أكتر عشان قوتها وإيمانها لكن هي شايفة إن النجومية دي زائلة، بس الإيمان هو اللي باقي.