أخر الاخبار

جريمة تشيب ليها الولادن وحكم غريب

يوم 4 يناير نشرنا تدوينة عن زوجة حامل (اسمها رانيا صلاح الدين)، جوزها (سمير ونيس البهي) دبـ.ـحها بشكل وحشي، وطعنها 44 طعنة، لدرجة إن نصل السكينة اتعوج فكمّل بسكينة تانية، واتحاكم على قتـ.ـلها هي وجنينها، وأخد مؤبد في حكم أول درجة. في الاستئناف اتخفف الحكم إلى 5 سنوات! لكن بعد نشر التدوينة، تواصلت معانا شقيقة رانيا ومحاميتها، وبعتت لنا أوراق من القضية سبّبت لنا حالة من الصدمة والقهر.

الحكم كان صادم جدا! المحكمة بتقول بوضوح إن حكم المؤبد "قد صدر صحيحًا"، وإن فيه أدلة يقينية ثابتة على قـ.تل زوجته وجنينها، وإن الأدلة دي "تؤدي إلى ما رتّبه الحكم عليها" اللي هو حكم المؤبد يعني، وكمان أضافت المحكمة إن الحكم ده تناول دفوع المتهم ورد عليها ردود سائغة تتفق وصحيح القانون، يعني المحكمة شايفة الحكم صحيح تمامًا... لكن في الفقرة اللي بعدها المحكمة بتقول بالنص: "المحكمة ترى أن يكفي ما لاقاه المتهم من فقد لزوجته وابنه وتدمير أسرته بما لهم من ألم نفسي يضاهي العقوبة البدنية.." وبعدين بتضيف: "وحرصًا من المحكمة على المتهم ومستقبله فإنها ترى القضاء على المتهم بالسجن المشدد لمدة خمس سنوات". 

هنا محتاجين نسأل: يعني إيه عدالة؟ مش دورها إنصاف المظلوم من اللي ظلمه؟ مش المظلوم هنا الست اللي اتدبـحـ.ت وأسرتها؟ مش البديهي إن المجرم يدفع تمن مناسب لجريمته؟ هل هدف العدالة الحرص على مستقبل القـ.ـاتل والطبطبة على مشاعره عشان خسر مراته وابنه (اللي هو قـاتـ.ـلهم بإيده)؟ مش بيقولوا في كتب القانون إن هدفه ردع المجرمين المحتملين وحماية ضحاياهم المحتملين؟ هل أي مجرم محتمل لما يشوف المحكمة خايفة على مشاعر القاتـ.ـل هايخاف يقـ.تل مراته والا هايتشجّع؟

هنا بقى لازم نقف شوية لإن ورق القضية بيقول تفاصيل فعلا صعب تصديقها. بس قبل ما نتكلم فيها خلونا نتفق على إن محكمة الاستئناف اللي خفّفت الحكم، أقرّت إن أدلة حكم المؤبد سليمة ومقنعة وإن دفوع المتهم اترد عليها ردود قانونية سليمة، لكنها حكمت بإن كفاية على القاتـ.ـل حزنه، واعتبرته عقاب مستحق.

أول تفصيلة إن القاتـ.ـل اعترف بجريمته ومثّلها قدام النيابة. اعترف إنه طعنها في عنقها تلات طعنات بسكين "إلى أن انحنى طرف سلاحه، فاستل سكينًا آخر ووالى طعنها في بطنها، ثم أعمله في عنقها (يعني دبـ.ـحها) حتى بات كاملاً داخلها... وحاكى كيفية ارتكابه الواقعة بمعاينة مصوّرة". المحضر بيوصف إصابة العنق بالتحديد: "طعن ذبحي غائر.. مع عدة جروح طعنية غائرة واصلة للفقرات العنقية، مع قطع كامل بالأوعية الدموية الرئيسية بالعنق والقصبة الهوائية والمريء". ده حتى الأضحية مش بتندبـ.ـح بالعنف اللي يوصل للفقرات العنقية ويعوج سلاح السكينة! الأكتر إن المحضر بيوصف إصابة الجنين المكتمل بـ 11 طعنة من بين الـ 44 طعنة اللي تلقّتها الأم. في تقرير الطب الشرعي بيتقال ده كله مع إضافة خروج أمعاءها من بطنها.. كل ده لم يمنع المحكمة من الحرص على المتهم ومستقبله.

رانيا استغاثت بأسرتها قبل موعد ولادتها بأيام، وبحسب أقوالهم، طلبت ينقذوها بسرعة لما حسّت إنه هايقـ.ـتلها، جريوا على بيتها لقوه دبحـ.ـها من دقايق. مين هنا اللي العدالة تقلق على مشاعره ومستقبله: أب وأم منتظرين حفيدهم فيلاقوا بنتهم مدبـ.ـوحة حرفيًّا بحسب المحاضر والطب الشرعي، والا القاتــ.ــل اللي دبـــ.حـها لدرجة إتلاف سلاح السكينة واستكمال الجريمة بسكينة تانية؟

الحقيقة تفاصيل القضية كلها أصعب من بعض. دفاع القاتـ..ل ادعى إنه دخل مصحات نفسية في تواريخ سابقة عشان يفلت من العقاب، لكن محامية رانيا طلبت شهادة تحركات تثبت إنه كان خارج مصر في الفترة دي، فالمحكمة أمرت بإيداع المتهم تحت الملاحظة في العباسية لمدة 45 يوم عشان لجنة خماسية متخصصة تفحصه لمدة 60 يوم، وقالت المحكمة عن تقرير اللجنة: "لم تظهر الأبحاث النفسية أي دلالات على وجود اضطراب نفسي أو عقلي، أو تدهور بالقدرات العقلية، بل أظهرت تعمده الكذب والمراوغة والنزعة الإجرامية، وجميعها من سمات الشخصية السيكوباتية (الإجرامية)... أنه لا يعاني من أعراض دالة على وجود اضطراب عقلي أو نفسي في الوقت الحالي أو في وقت ارتكاب الواقعة محل الاتهام يفقده أو يُنقصه الإدراك والاختيار وسلامة الإرادة والتمييز والحكم الصائب على الأمور ومعرفة الخطأ من الصواب؛ مما يجعله مسؤولاً عن الاتهام المسند إليه". يعني لجنة خماسية مش ثلاثية، فحصته لمدة 60 يوم، وده رأيها.

 بحسب أسرة رانيا، إن المتهم طلب من رانيا تسجل الفيلا اللي كانوا فيها باسمها، وهي كانت فيلا خاصة بعمه المقيم في الخارج، وعليها قضايا بينه وبين أسرة القاتـ..ـل، فرانيا رفضت لإن الفيلا مش من حقهم، فدبـ.ـحها.

بنفكّر في رانيا كتير.. بنفكر في ست بتستعد إنها تبقى أم، فتنـ.ــدبح وتتلقى 44 طعنة. بنقرا تقرير فض الأحراز اللي بيوصف سكينة بإنها متنيّة والتانية بإن طرفها المدبب مكسور، وبنفكر في اللحظات الرهيبة اللي عاشتها رانيا وهي شايفة "شريك حياتها" بيكسر السكاكين في جسمها.. عشان في الآخر المحكمة "تحرص" على مستقبله وتخاف على مشاعره!

بنفكر في ستات كتير زي رانيا، خسروا حياتهن بدون ما القاتــ.ل يتحاسب، رانيا كانت أسرتها شجاعة، دافعت عنها ووصّلت صوتها، زي ما الأستاذة أمنية صلاح أختها ومحاميتها عملت في قاعات المحاكم وخارجها. بنفكر في كل الستات اللي دفعن تمن فادح للعنف الأسري، وده سبب كتابتنا المستمرة عن الموضوع: بنطالب البرلمان بمناقشة القانون الموحد لمناهضة العنف ضد المرأة، عشان مش عايزين دم الستات يفضل رخيص بالشكل ده.
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -