قصة حب قوية عاشتها رجاء بلمليح في مصر مع المنتج المصري محمد شرف الدين كللوها بالجواز في التسعينات، وأنجبوا ولد وحيد سمّوه عمر، ولظروف شغل جوزها في الإمارات، سافرت رجاء معاه وكوّنت علاقة وطيدة بالعائلة الحاكمة هناك وحصلت على الجنسية الإماراتية، وانتج لها جوزها ألبوم خليجي بعنوان حاسب وكان الأخير في مسيرتها الفنية.
سنة 2003 اكتشفت رجاء اصابتها بالداء الخبيث، وحاولت تقاومه إلا أنه رجع هاجمها تاني بعد 4 سنين ونجح في الانتصار عليها بوضع النهاية لآلامها في مستشفى الشيخ زايد بمدينة الرباط يوم 2 سبتمبر سنة 2007 عن عمر بيناهز الـ45 سنة، وده الخبر اللي صدم محبيها.
الوصية الأخيرة للنجمة الراحلة كشفها الصحفي والمحامي أيمن نور ركزت فيها على رعاية ابنها رعاية كاملة وتنشئته تنشأة سليمة، أما الغريب فكان وصيتها لابنها بعدم احتراف الفن، فعلى الرغم من عشقها لمهنتها وموهبتها، إلا أنها اشفقت عليه أنه يمشي في طريق مليان بالشوك.
المؤسف أن عمر بعد سنين طويلة من رحيل والدته، سافر الدار البيضاء وقرر يطالب أفراد أسرتها بحقه في ميراث والدته، خاصة أنهم مكنوش على اتصال بيه من بعد رحيلها، والمعروف أن رجاء بتمتلك في المغرب عقارات وودائع بنكية وأراضي، إلا أنه اتفاجئ بموقف جدته رفضت تسليمه أي حاجة خاصة برجاء، واشترطت عليه يكمل السن القانوني عشان يقدر ياخد حقه بعد ما تاخد هي حقها الشرعي في ميراث بنتها.
أما جوز رجاء، فاحتفل سنة 2011 بكتب كتابه على الفنانة التونسية فريال يوسف بشكل مفاجئ، والغريب أنها انفصلت عنه بعد حوالي 3 شهور بس، وده قبل زفافهم، وف تصريحات ليها في برنامج الستات مايعرفوش يكدبوا، حطت فريال المنتج المصري في موقف محرج لما كشفت عن سبب انفصالها عنه وقالت: وافقت اتجوزه من غير فترة تعارف كبيرة، وقتها قراري كان رد فعل على شخص تاني كان بيحبني بس مكنش ينفع نكمل مع بعض، بس بعد كتب الكتاب، اكتشفت أن كدبه كتير وكان مخبي عليا بلاوي وقررت انفصل عنه قبل ما يجمعنا بيت واحد.