أخر الاخبار

الشاب الذي تحول بطل في امريكا

الشاب دا اتحول لبطل قومي في أمريكا.. لسبب غريب.

أنه قتل شخص بريء.

اسمه "لويجي مانيوني Luigi Mangione".. شاب في العشرينات مقبل على الحياة وبيحبها.

"لويجي" كان بيهوي كمال الاجسام ورياضة ركوب الامواج.. وبيمارسهم بانتظام.

ولكن لأن "لويجي" عنده مشكلة في ضهره من صغره.. ضهره رجع يؤلمه تاني.

وراح للدكتور...

 والدكتور قال له انه محتاج موافقة شركة التأمين عشان يعمل له أشعات وفحوصات معينة.

هنا في نقطة لازم تتوضح.

أمريكا مفيهاش تأمين صحي حكومي زي عندنا.. التأمين الصحي بتتولاه شركات خاصة.. وانت بتدفع لها قسط التأمين شهريا.

ودايما.. طول الوقت.. الشركات دي عندها ثغرات عشان ماتتكلفش علاجك وترفض طلبك.

ملايين الامريكيين.. بدون مبالغة يمكن عشرات الملايين.. بيعانوا مع شركات التامين الصحي دي.. وفي ناس بتموت بسبب انه اترفض علاجها.. وناس بتتسجن عشان اتعالجت!

والعلاج والرعاية الصحية في امريكا غالية جدا.. ممكن كسر في إصبعك يكلفك عشرين أو ثلاثين ألف دولار.

وبالتالي لما بيحاول "لويجي" يتواصل مع شركة التأمين.. بيقعدوا يأجلوه ويتهربوا منه يوم ورا يوم.

والأيام بتبقى أسابيع.

وبعدين شهور...

و"لويجي" من فرط الألم مبقاش قادر يمشي ولا عارف ينام...

وباع كل حاجته تقريبا وراح للدكتور ودفع هو تمن الفحوصات.

وجاله الخبر السيء.

مفيش أي فرصة للتأجيل خلاص. لازم عملية جراحية وألا...

وإلا حيصاب بالشلل.

وبيروح "لويجي" لأمه "كاثلين" ويقول لها انه حيعمل العملية.. وبيسألها ليه معملوهاش من طفولته.. وبتقول له ان مكانش معاهم فلوس وشركة التأمين رفضتها.

وبيوافق الدكتور يدخل "لويجي" العملية بشرط المستشفيات المعتاد.. لو شركة التأمين رفضت تغطي تكاليف العملية.. "لويجي" حيبقى ملتزم بيها.. وإلا حيتسجن.

وبيعمل "لويجي" العملية.

وبتنجح.

وبعد شهر بالضبط كان شفى تماما.. ورجع يتمرن ويشيل حديد ويركب الأمواج ويسافر وهو مبسوط.

لكن شركة التأمين عمالة ترفض طلباته بتغطية تكاليف العملية.

طلب ورا طلب يرفضوه ويراوغوا ويتهربوا.

وبيقرر "لويجي" ان لازم يتوضع حد لجشع شركات التأمين الصحي وسرقتها للناس.

وفي اول أيام ديسمبر السنة اللي فاتت.. سنة ٢٠٢٤.. بيجيب مسدس ويحط فيه ٣ طلقات.. وكتب على الرصاصات بالماركر "انكر.. دافع.. تهرب Deny.. defend.. depose"...

ودا الشعار غير المكتوب اللي بتتبعه شركات التأمين الصحي مع الناس.

ينكروا ان الحالة تستحق التغطية.. يدافعوا عن موقفهم بشراسة.. ويتهربوا من التزامهم نحو المريض في النهاية.

وبيدخل "لويجي" اونلاين يتتبع تحركات العضو المنتدب لاكبر شركة تأمين صحي في امريكا.

"براين طومسون Brian Robert Thompson".. العضو المنتدب لشركة "يونايتد للرعاية الصحية UnitedHealthcare".

ودي اكبر شركة تأمين صحي في أمريكا.. ومؤمنة صحيا على عشرات الملايين.. من بينهم "لويجي".

بيقرر انهم السبب في عذابه من طفولته.. والسبب في الشهور الأليمة اللي عاشها.. والسبب انه ممكن يتسجن لأنهم رافضين يغطوا مصاريف عمليته.

بيعرف من موقع الشركة ان العضو المنتدب دا حيجتمع مع مجلس الادارة في فندق كبير.. فبياخد الأوتوبيس.. ويلبس هودي ويرفع غطاء الرأس بتاعه يداري وشه.

وبعد ساعات من الانتظار بيوصل العضو المنتدب وينزل من عربية فخمة ويتوجه لباب الفندق.

وبييجي "لويجي" من وراه.. وبيرفع مسدسه اللي مركب له كاتم صوت...

ويطلق الرصاصات الثلاثة.

وبتخترق الرصاصات كلها ضهر "طومسون".

وبيسقط جثة هامدة.

وبيجري "لويجي".. ويركب دراجة ويفر مبتعدا...

وبيوصل محطة القطر منهك لاهث غارق في العرق.. ورائحة البارود لسه في يديه وملابسه... 

وهناك بيركب لولاية تانية.

بنسلفانيا.

بتجيب الشرطة كاميرات الفندق.. وأول الشرطة ما بتنشر صورته.. في ناس بتعرفه فورا.

لكن محدش بيرضى يرشد عنه.

دا بسبب الكلمات التلاتة اللي انتشر انه كتبهم على مظاريف الرصاصات.

الناس فهمت ان الشاب دا عمل كده انتقاما من شركة التأمين اللي آذتهم وتسببت في مرضهم ووفاة احبائهم.. أو سجنهم لسنين.

وبتبدأ حملات شعبية لدعم القاتل "لويجي".

الشرطة بتعرض ١٠ آلاف دولار للي يبلغ عنه.. ومحدش بيبلغ.

بيرفعوا المبلغ لخمسين ألف دولار...

وبرضه محدش بيبلغ.

كل الرجالة بتهتف له وتشير اليه كبطل.. وفي رجل صاحب مزرعة توفيت زوجته بسبب تعنت شركة التأمين.. عمل له فيديو بيعرض عليه شاحنته هدية.. يسوقها ويتحرك بيها يقتل بقية رؤساء شركات التأمين ويكمل "مشواره النبيل".

وعملت السيدات الكبار حملات يطلبوا منه انه يطرق بيت اي حد فيهن اي وقت وتغسل له ملابسه وتقدم له فلوس ووجبة دافئة عشان يقدر يواصل الهرب.

والفتيات بيعملوا حملات يطلبوا منه الزواج. حتى ان صحفية في مجلة "تايم" وهي بتكتب عنه تغزلت فيه ووصفته بالشاب القوي الوسيم.

وبدأت تتعمل منشورات لرؤساء شركات التامين التانية مكتوب تحتها "الدور عليكم" و"عدالة لويجي قادمة".

طبعا السوشيل ميديا حذفت كل منشورات وبوستات وفيديوهات الدعم دي.. فلما الناس ملقهوش متنفس.. نزلوا في الشوارع يتظاهروا دعما له.. وهم شايلين يفط عليها اسمه وصورته.. وبيعملوله جرافيتي على الحيطان في الشوارع.

وكان نو مستخبي في موتيل صغير.. وبعد خمس ايام كانت فلوسه قلت.. وشعر بالجوع...

 بيقرر يشتري ارخص وجبة في امريكا.. وبيدخل "لويجي" متخفي لفرع ماكدونالدز.

وهناك بيتعرفه راجل عجوز وبيقول للجرسون انه وجبته على حسابه.. هو حيعزمه لان دا البطل اللي قضى على "طومسون".. العضو المنتدب لشركة يونايتد.

لكن موظف ماكدونالدز بيدخل على الفور ويتصل بالشرطة.

وبتيجي الشرطة.. وبتقبض على "لويجي".
وبيتقدم للمحاكمة بنهمة حيازة سلاح وإرهاب وقتل عمد وغيرهم.

وبيحتشد الناس في مظاهرات كبيرة في أولى جلسات محاكمته.. ويرفعوا لافتات الدعم...

حتى والشرطة بتنقله للسجن لحد ما تخلص المحاكمة.. الناس بتحاوطهم وتهتف له.

لما بيتقبض عليه بيلاقوا معاه جواب كان كاتبه للمباحث الفيدرالية.. لو الشرطة قتلته وهي بتطارده.. بيوضح قصته وهو ليه عمل كده.. لانه بيحترمهم ومقدر اللي بيعملوه لحماية الوطن.

لازالت محاكمة "لويجي" مخلصتش.. لكن المدعي العام الامريكي "بام بوندي Pam Bondi" اصدرت تعليماتها ان مكتب المدعي العام يحاول يجيبله عقوبة الإعدام.

لاحظ في الصورة التانية نعي شركة يونايتد في اليوم التالي لمقتل رئيسها.. معمول عليه من الامريكيين ٦٥ ألف "هاها" في يوم واحد!

لازالت محاكمة "لويجي" مخلصتش.. وهو اعلن انه غير مذنب.

الناس عملت له حملة تبرعات اتجمع فيها لحد دلوقتي مليون وربع مليون دولار.. وبيشبهوه بالجوكر في فيلم باتمان.. او فانديتا في V for Vendetta. 

البطل اللي بيحارب سيستم ظالم كامل.

حتى أساتذة جامعات وسياسيين.. أعلنوا انهم لا يشجعوا على العنف.. لكنهم عاذرين "لويجي" ومتفهمين دوافعه.

اللافت ان عملة "لويجي" اتسببت أن شركات التأمين الصحي صدرلها تعليمات من رؤساء مجلس الإدارة.. تخفف من حدة مراوغتها وتنصلها من تغطية الحالات شوية.

إيه رأيك أنت.. "لويجي" بطل.. وللا مجرم؟

#awareness
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -