جماهير النادي الأهلي في كل مكان تعتذر لعلي معلول ملك الحلول
مبدأيا كده موضوع إن معلول فنيا وبدنيا مش جاهز ده غير صحيح بالمرة ومشاركة معلول أثبتت العكس.
ببساطه شديده حضرتك نزلت معلول يلعب مع شوية شباب في كأس الرابطه بحجة إنك بتقوم بتجهيزه، الراجل لعب وكان كويس وصنع هدف كمان.
السؤال هنا بيطرح نفسه ، معلول مبيلعبش ليه في الدوري ؟
هو في ظهير أيسر موجود أساسا دلوقتي ؟
لا مفيش غيره أصلا ، يحيي والدبيس أتصابوا !
طب كوكا أصلا وسط ملعب ، بيلعب ظهير علي أساس إيه وإيه أضافاته هجوميا علي الخط الشمال ؟
وبعدين تعالي هنا أقولك ، معلول يجهز لإيه أصلا ؟
للدوري المصري ؟
اللي هو بالنسبة لمعلول دورة رمضانية ؟
حضرتك لما نزلته في مباراة حرس الحدود صنع 3 فرص بعرضيات مثاليه محدش بيعرف يعملها غيره وفي 19 دقيقه فقط !
طيب حضرتك لما جيت تنزله النهاردة أمام البنك الأهلي ليه عشمتوا وخليتوا يلبس التيشيرت وبعدين قولتلوا لأ أرجع مش هتنزل ، هو ناقص رفض أكثر ما هو مرفوض ، يعني مش كفايه اللي حصله من كولر، هو أنتوا في رخصة التدريب بتاعتكم مأخدتوش أزاي تتعاملوا مع نفسية اللاعبين!!
حضرتك بتحاسب معلول علي إيه دلوقتي ؟
علي أنك مقعده دكه دايما فالطبيعي ميبقاش عنده شغف يفرح حتي في هدف فوز ممكن يحسم الدوري ، بتحاسبه علي مشاعره ؟
بتحاسبه أنه مشي من الملعب بسرعة بعد المباراة لأنه صعبت عليه نفسه وشاف قيمته أصبحت قليلة جداً ، ما تحط نفسك مكانه طيب ؟
وبعدين تعالي هنا يا كابتن عماد أقولك ، ده لاعب غير معلول لو كان حصل معاه حركه زي بتاعه النهاردة دي كان قلب الدنيا كلها زي ما السوليه قلب الدنيا لمجرد أنه أتبدل في المباراة !
معلول معملش أي رد فعل وقتها ، متكلمش كلمه واحده ، سمع الكلام وبس ، جاي تحاسبه علي أحترامه حتي ؟
بص بقي يا كابتن عماد وأنت يا بيبو ، معلول ميستاهلش اللي بيحصل معاه ده أبدا ، ده لاعب خدمك سنين ولاعب تاريخي وأسطوري للأهلي، وقدملك كتير قوي، هو بس إنسان طبيعي ، كان مستني من بيته تقدير بسيط في نهاية رحلته لكن للأسف الشديد بيته خذله !
ودي عمرها ما كانت أخلاقك يا بيبو ولا أخلاق الأهلاوية، والجميل له الأجمل منه يا كباتن أكبر نادي في أفريقيا، نادي المبادئ والقيم الذي تم تأسيسه علي ذلك، ونشأنا نحب ونشجع النادي الأهلي لإلتزامه بالقيم والمبادئ والسلوكيات الإنسانية والأخلاقية ..
علي معلول في مباراة الأهلي والبنك نزل في الدقيقة 90 بدل من إمام عاشور وطبعا ده مش وقت للتقييم، علشان معلول خارج التقييم ولكن اللي حصل من الكابتن عماد النحاس مع معلول قبل نزوله غير إحترافي بالمرة.
هيفضل الجيل ده أسمه جيل علي معلول وهيفضل معلول واحد من أساطير النادي الأهلي على مدار التاريخ، وشكرا لمعلول على أحترامه للنادي الأهلي، ورفضه أنه يكون ليه أي رد فعل مع أنه كان هيكون معاه حق لو عمله، ولازم معلول يلعب المباراة الختامية بشكل أساسي تعويضا للي حصل معاه النهاردة ده يا كابتن بيبو ويا كابتن عماد .
جبر الخواطر يا نادي القيم والمبادئ، ومن أخطأ فعليه بتصويب الخطأ بالشكل المناسب والمرضي.
وفي النهاية رسالتي موجهة لإدارة النادي الأهلي برئاسة الأسطورة الكابتن محمود الخطيب ، إشراك علي معلول أساسي في المباراة النهائية وتكريمه بالإحتفال بدرع الدوري مع زملائه أقل ما يجب من رد أعتبار لهذا اللاعب الإنسان الخلوق، لما بدر من تصرف مستفز للاعب من الكابتن عماد النحاس، الذي لا أتخيل أبداً أنه كان يقصد بهذا التصرف التقليل من قيمة معلول، ولكنه تصرف تلقائي وغير محسوب وتحت ضغط نفسي من المباراة والنتيجة، ولكن لا يجب أن يصدر هذا التصرف من لاعب كبير وحنك وعلي خلق، قبل أن يكون مدربا لأكبر نادي في أفريقيا، الغلط مردود ونرجوا من الجميع أن يعملوا علي ترضية اللاعب الذي تعشقه جماهير النادي الأهلي في كل مكان.